Mádenı murany basqarý salasynda maman daıarlaıtyn kýrstar ashylýy múmkin

ASTANA. KAZINFORM — Qazaqstandaǵy JOO-da mádenı murany basqarý salasynyń mamandaryn daıarlaıtyn bilim berý baǵdarlamalaryn jandandyrý qajet.

Bul týraly Mádenıet jáne aqparat mınıstri Aıda Balaeva aıtty.

— Mádenı murany basqarý salasynda mamandardy daıarlaıtyn bilim berý baǵdarlamalary men kýrstar joqtyń qasy, sondaı-aq jergilikti qaýymdastyqtardyń atsalysý deńgeıi óte tómen. Osy oraıda, Qazaqstandaǵy joǵary oqý oryndarynda mádenı murany basqarý salasy boıynsha mamandar daıarlaıtyn bilim berý baǵdarlamalaryn jandandyrý qajet dep oılaımyz,— dedi Mádenıet mınıstri Úkimettiń búgingi otyrysynda.

Onymen qosa, ıÝNESKO granty aıasynda biliktilikti arttyrý kýrstarynan bar bolǵany Ulttyq komıtettiń 10 ǵana múshesi ótken.

— Mádenı murany óskeleń urpaqqa jetkizýshilerdi jergilikti atqarýshy organdar tarapynan qoldaý jetkiliksiz, sondaı-aq, obektilerdiń týrıstik ınfraqurylymy kóbinese halyqaralyq talaptarǵa saı kelmeıdi. Óńirlerde murany nasıhattaýǵa arnalǵan úıirmeler men sektsııalar jetispeıdi, — dedi A. Balaeva.

Osy oraıda, mınıstrlik júıeli sharalardy qamtıtyn 3 baǵyttaǵy jospar jobasyn jasap, memorgandarmen kelisip, Úkimet qaraýyna usynýǵa daıyn. Josparda biliktilikti arttyrý kýrstaryn jáne eldiń joǵary oqý oryndarynda pánaralyq bilim berý baǵdarlamalaryn engizý arqyly ákimdik qyzmetkerleriniń, bilim, ǵylym jáne mádenıet uıymdary mamandarynyń kásibı deńgeıin arttyrý qaralǵan.

— Eń mańyzdy mindetterdiń biri — joıylý qaýpi tónip turǵan elementterdi túgendeý jáne qujattaý boıynsha keshendi zertteý jumystaryn júrgizý, — dedi mınıstr.

Buǵan deıin Mádenıet mınıstri Qoja Ahmet ıAsaýı kesenesi mańynda kelisilmegen qurylys toqtamaı turǵanyn aıtqan edi.

Sonymen birge, mınıstr Djeı Lo kontsertine qýana-qýana baratynyn, sheteldik juldyzdar kontsertterin uıymdastyratyn kásipkerlerge barynsha qoldaý kórsetiletinin aıtty.