Mádenı muralardy qorǵaý úshin 7 mınıstrlik jumys júrgizýi kerek — Balaeva
ASTANA. KAZINFORM — Mádenıet jáne aqparat mınıstri Aıda Balaeva mádenı muralardy saqtaý jáne qorǵaý úshin birneshe mınıstrliktiń júıeli jumysyn biriktiretin Keshendi jospar ázirleý keregin aıtty.
Úkimet otyrysynda mınıstr Premer-mınıstrge mádenı muralardy saqtaý máselelerin sheshý ortalyq jáne jergilikti atqarýshy organdardyń birlesken júıeli jumysyn qajet etetinin, barlyq múddeli taraptyń qyzmetin biriktiretin Keshendi jospar ázirleý keregin aıtty.
— Osy rette, quzyrly memlekettik organdarǵa myna máselelerge qatysty tapsyrma berýińizdi suraımyz: oblys ákimdikterine eskertkishterdi qorǵaýdyń quqyqtyq rejımin qamtamasyz etý, dúnıejúzilik mura nysandarynyń býferlik jáne qorǵaý aımaqtaryn aıqyndaý; ıÝNESKO formaty boıynsha mádenı mura elementterin qujattaý men túgendeý jumystaryna nazar aýdarý; ıÝNESKO men IKOMOS sarapshylarynyń qatysýymen mádenı mura máseleleri boıynsha semınarlar, dárister men aǵartýshylyq is-sharalar ótkizý, — dedi A. Balaeva Úkimet otyrysynda.
Ǵylym jáne joǵary bilim mınıstrligi mádenı mura salasyndaǵy mamandardy daıarlaý boıynsha bilim berý baǵdarlamalaryn engizýmen, mádenı-tarıhı murany zertteý jáne saqtaý salasymen aınalysatyn jas ǵalymdarǵa grant berip, keshendi ǵylymı zertteýler júrgizýmen aınalysýy kerek.
Al Tsıfrlyq damý, ınnovatsııalar jáne aeroǵarysh ónerkásibi mınıstrliginen A. Balaeva mádenı-tarıhı nysandarǵa qatysty tsıfrlyq platformalar men ulttyq derekter bazalaryn ázirleýge qoldaý kórsetýin surady.
— Oqý-aǵartý mınıstrliginen oqýshylar arasynda muranyń qundylyǵyn uǵynýdy qalyptastyrýǵa baǵyttalǵan is-sharalar uıymdastyrýyn, Qarjy mınıstrliginen — murany saqtaý jáne tanymal etýge baǵyttalǵan sharalarǵa respýblıkalyq bıýdjetten qarajat qarastyrýyn, Syrtqy ister mınıstrliginen — halyqaralyq bastamalar men transulttyq nomınatsııalarǵa dıplomatııalyq jáne quqyqtyq qoldaý kórsetýin, IKKROM sııaqty halyqaralyq uıymdarmen ózara is-qımyldy jandandyrýyna nazar aýdarýyn suraımyz, — dedi A. Balaeva.
Sondaı-aq, Týrızm jáne sport mınıstrligi mádenı jáne tabıǵı mura nysandaryn qamtıtyn, ásirese aralas mura aımaqtaryna basymdyq berip, týrıstik marshrýttardy ázirlep, dúnıejúzilik jáne ulttyq mańyzy bar nysandardy qorǵaý aımaqtarynda týrıstik jáne sanıtarlyq ınfraqurylymdy damytýǵa járdemdesýi kerek.
Óz tarapynan, Mádenıet jáne aqparat mınıstrligi materıaldyq, materıaldyq emes jáne qujattyq murany saqtaý jónindegi keshendi jospardyń barlyq sharasyn iske asyrýdy, olardyń ádistemelik súıemeldenýin qamtamasyz etedi, sondaı-aq medıajobalarǵa, basylymdarǵa jáne tsıfrlyq platformalarǵa qatysýdy qosa alǵanda, júıeli aqparattyq qoldaýdy uıymdastyrady.
Buǵan deıin Mádenıet mınıstri Qoja Ahmet ıAsaýı kesenesi mańynda kelisilmegen qurylys toqtamaı turǵanyn aıtqan edi.
Sondaı-aq, 2026 jyly Qazaqstannyń 11 eskertkishin ıÝNESKO tizimine engizý josparlanyp otyr.