Mádenı muraǵa qatysty jańa zańnamalyq túzetýler arheologııa salasyn júıeleýge baǵyttalǵan
ASTANA. KAZINFORM — Atap aıtqanda, arheologııalyq jumystardy lıtsenzııalaý júıesin jetildirý, nysandardy qazba jumystary aıaqtalǵannan keıin qorǵaý, qorshalǵan aýmaqty qalpyna keltirý tárizdi sharalar qarastyrylǵan. Bul týraly Memlekettik keńesshi Erlan Qarın Telegram-arnasynda jazdy.
Ulttyq quryltaı aıasynda Memleket basshysynyń bastamalary men tapsyrmalaryn júıeli túrde júzege asyrý jalǵasýda.
Búgin Prezıdent tarıhı-mádenı mura nysandaryn qorǵaý máseleleri jónindegi Zańǵa qol qoıdy. Memlekettik keńesshiniń sózinshe, zańnamalyq túzetýler arheologııa salasyn júıeleýge baǵyttalǵan.
— Atap aıtqanda, arheologııalyq jumystardy lıtsenzııalaý júıesin jetildirý, nysandardy qazba jumystary aıaqtalǵannan keıin qorǵaý, qorshalǵan aýmaqty qalpyna keltirý, tabylǵan materıaldardy ortalyqtandyrylǵan negizde saqtaý sharalary qarastyrylǵan. Sondaı-aq zańda Memlekettik qor, Ulttyq depozıtarıı, Biryńǵaı avtomattandyrylǵan aqparattyq júıe qurý kózdelgen. Túptep kelgende osy qadamdar tarıhı murany qorǵaý isin jaqsartady, zańsyz qazba jumystaryna qarsy kúrestiń tıimdiligin arttyrady ári arheologııa salasyndaǵy baqylaý men tártipti qamtamasyz etedi, — dedi Qarın.
Sonymen qatar Úkimet 2026-2028 jyldarǵa arnalǵan Nashaqorlyqqa jáne esirtki bıznesine qarsy kúres jónindegi jańa keshendi jospardy qabyldady. Erlan Qarın jańa josparda nashaqorlyqqa qarsy is-qımyl salasynda buǵan deıin qabyldanǵan sharalardy júzege asyrý tájirıbesi eskerilgenin aıtty.
— Nashaqorlyqtyń aldyn alý jáne qoǵamdyq densaýlyq saqtaý máselelerin sheshý blogy kúsheıtildi. Eń bastysy, qujatty ázirleýge Prezıdent janyndaǵy Jastar saıasaty jónindegi keńestiń músheleri aıyryqsha atsalysty. Olar qoǵamda nashaqorlyqqa qarsy nóldik tózimdilikti ornyqtyrý isinen de shet qalǵan emes, — dep túıindedi ol.
Budan buryn Erlan Qarın áskerı-patrıottyq tárbıe jónindegi jumysty kúsheıtýdi tapsyrǵanyn jazǵan edik.