«Mádenı mura» jobasyn júzege asyrý budan bylaı da bizdiń jiti nazarymyzda bolýy tıis - M. Qul-Muhammed
ASTANA. Qyrkúıektiń 23-i. QazAqparat /Ernur Aqanbaı/ -«Mádenı mura» strategııalyq ulttyq jobasyn júzege asyrý budan bylaı da bizdiń jiti nazarymyzda bolýy tıis. Búgin Astanada ótken Mádenıet mınıstrliginiń keńeıtilgen alqa májilisinde mınıstr Muhtar Qul-Muhammed osylaı aıtty.
Alqada «Mádenı mura» baǵdarlamasy qolǵa alynǵaly beri tabysty iske asyrylyp jatqanyn aıtqan M. Qul-Muhammed: «Men jaqynda Elbasynyń qabyldaýynda bolyp, osy baǵdarlama aıasynda atqarylǵan jumystar jaıly baıandadym. Bul rette maqtan tutarlyq ister bar. Máselen, baǵdarlama iske asyrylǵan kezeń ishinde elimizde 58 tarıhı jáne mádenı eskertkishter qalpyna keltirildi. Bul óte úlken jetistik. Osynshama nysannyń bútindelýi «Mádenı mura» jobasynyń ult mádenıetiniń tarıhyndaǵy erekshe baǵdarlama ekendigin bildiredi», dedi mınıstr.
Onyń sózine qaraǵanda, qalpyna keltirilgen eskertkishterdiń biri qulaýǵa shaq qalǵandar bolsa, keıbireýleri tipti qulap ta qalǵandar. «Ol nysandar endi bir eki-úsh jyl turǵan kezde keıbir arhıtektýralyq kelbetin bylaı qoıǵanda, árbir kirpishiniń ózi tarıhı eskertkish bolyp sanalatyn muralarymyzdan aıyrylyp qalýdyń az-aq aldynda qalyppyz», dedi mınıstr.
M. Qul-Muhammed joba aıasynda 2010 jyly 19 mádenı oshaqtardy qalpyna keltirý jumystary júrgizilip jatqanyn atap kórsetti. «Jobanyń ekinshi kezeńi sheńberinde elimizde bes jáne shetelde bir, Damask qalasyndaǵy Sultan Beıbarys kesenesi, tarıh jáne mádenıet eskertkishin qalpyna keltirý jumystary aıaqtaldy», dedi ol.
