«Mádenı mura» jobasy aıasynda jumys istep júrgen jas mamandardyń jalaqysyn kóterý qajet - Q. Sultanov
ASTANA. Aqpannyń 24-i. QazAqparat /Ernur Aqanbaı/ - QR Parlamenti Senatynyń depýtaty Qýanysh Sultanovtyń pikirinshe, «Mádenı mura» jobasy aıasynda jumys istep júrgen jas mamandardy turaqtandyrý úshin olardyń jalaqysyn kóterý qajet.
Senator bul oıyn búgin Astanada ótken 2009-2011 jyldarǵa arnalǵan «Mádenı mura» Ulttyq strategııalyq jobasyn júzege asyrý jónindegi Qoǵamdyq keńestiń kezekti otyrysynda aıtty, dep habarlaıdy QazAqparat.
Q. Sultanovtyń aıtýynsha, atalmysh baǵdarlama júzege asyryla bastaǵaly jobanyń tóńiregine kóptegen jas mamandar toptastyryldy. Olardy joǵaltyp almaı, osy baǵyttaǵy jumysty jalǵastyrýǵa yntalandyrý qajet. Ol úshin eńbekaqy máselesin sheshken jón. Bul óz kezeginde joba aıasynda jumys istegisi keletin jastardyń qarasyn kóbeıtýge septigin tıgizedi. «Baǵdarlama sheńberinde qazaqtyń tarıhynda jasalmaǵan jumystar atqaryldy. Bas-aıaǵy tórt-bes jyldyń ishinde mádenıetimizdi, tarıhymyzdy kórsetetin talaı-talaı dúnıeler jaryq kórdi. Bul jumysty jalǵastyrýymyz kerek», dedi senator.
