«Mádenı mura týraly» arnaıy zań qabyldaý kerek - Áshirbek Syǵaı
ALMATY. 19 naýryz. QazAqparat - Mádenıet mınıstrligi shyǵarmashylyq eńbegi arqyly ulttyń mereıin ósirgen qaıratkerlerdiń tizimin jasap, olardyń joqshysy bolý kerek.
Bul týraly búgin Almatyda ótken «Áýbákir Ysmaıylov shyǵarmashylyǵy mádenıettiń ózara árekettestigi aspektisinde» dep atalatyn ǵylymı-tájirıbelik konferetsııada aıtyldy.
«Óner qaıratkerleriniń murasyn nasıhattaý elimizde áli kemshin túsip jatyr. Ataýsyz jatqan ónerpazdarymyz kóp. Mysaly Seıfolla Telqarev degen akter boldy. Teatrda, kınoda oınaǵan rólderin qarasańyz qazaqtyń kúlkili rólderiniń has sheberi. Qaıtys bolǵanyna 30 jyldan asty, ataýsyz ketti. Opera ónerinde Ánýarbek Úmbetbaev degen halyq ártisi boldy. Ol kisi týraly da eshkim jaq ashpaıdy. Sol sııaqty qazaq sahnasynyń pıoneri bolǵan Qapan Badyrovty ta izdep jatqan eshkim joq», - deıdi mádenıettanýshy, QR Memlekettik syılyǵynyń ıegeri Áshirbek Syǵaı. Onyń aıtýynsha, shyǵarmashylyq ıeleriniń esimin ulyqtap, eńbekterin jastarǵa nasıhattaý úshin «Mádenı mura týraly» arnaıy zań kerek. Qazir úlken qyzmettegi ul-qyzy men týǵan-týysqany bar óner qaıratkerleriniń ǵana mereıtoılary atap ótilip jatyr. Esimderi mereıtoı kezinde ǵana atalyp, qalǵan ýaqytta umyt qalatyn óner sańlaqtary kóp. Qazir mádenı murany jasaýshy tulǵalardyń emes, óziniń ne áıeliniń ákesinin atyn kóshege berip, masqara bolyp jatqan ákimsymaqtar da kezdesýde. Tipti Almatynyń irgesindegi aýyldardyń birinde Áset Beıseýovtiń esimi berilgen kóshege ákimqaranyń biri óz ákesiniń atyn berip, ol zııaly qaýym ókilderiniń qarsylyǵynan keıin ǵana qaıta bekitildi.
