«Mádenı mura» baǵdarlamasy aıasynda shyqqan kitaptardy ınternet arqyly nasıhattaýdy kúsheıtý qajet - M. Áshimbaev
ASTANA. Aqpannyń 24-i. QazAqparat /Ernur Aqanbaı/ - «Mádenı mura» baǵdarlamasy aıasynda shyǵyp jatqan kitaptardy ınternet arqyly nasıhattaý jumysyn kúsheıtý qajet.
Bul týraly búgin Astanada ótken 2009-2011 jyldarǵa arnalǵan «Mádenı mura» Ulttyq strategııalyq jobasyn júzege asyrý jónindegi Qoǵamdyq keńestiń kezekti otyrysynda QR Prezıdenti Ákimshiligi basshysynyń orynbasary Máýlen Áshimbaev aıtty, dep habarlaıdy QazAqparat.
Onyń pikirinshe, baǵdarlama aıasynda shyqqan kitaptardyń taralym máselesin sheshýdiń birden bir joly - kitaptardy ınternet arqyly taratyp, nasıhataý. «Osydan bir-eki jyl buryn Qoǵamdyq keńestiń tapsyrmasymen «Mádenı mura» atty ınternet-portal jasaldy. Portal jaqsy jumys istep jatyr. Onda birshama kitaptar, aýdıo jáne vıdeo jazbalar ornalastyryldy. Biz qazirgi zamannnyń úrdisterine beıimdelip, jumys isteýimiz kerek. Ǵylymı ınstıtýttar, qoǵamdyq keńestiń músheleri birigip osy portaldyń ishine aqparatty kóbirek kirgizýge jumys isteýi qajet», dedi M. Áshimbaev.
Elbasynyń tapsyrmasymen Úkimet ınternetti árbir aýylǵa jetkizý úshin jumys istep jatqanyn aıtqan ol, ınternet arqyly jer-jerdegi oqyrmandar baǵdarlama aıasynda shyǵyp jatqan kitaptarmen tanysyp jatsa, bul kitaptardyń nasıhattalýyna jol ashatyn bolady. Osy oraıda M. Áshimbaev baǵdarlama aıasynda daıyndalyp jatqan kitaptardyń sapasyna da muqııat nazar aýdarý qajettigin atap kórsetti.
M. Áshimbaevtyń sózine qaraǵanda, mádenı týrızmdi damytý máselesi kóńil kónshitpeıdi. Bul baǵytta keıbir dúnıeler áli de bosa ilgeri jyljymaı jatyr. Sondyqtan da mádenı týrızmniń jaǵdaıyn durystaý úshin Týrızm jáne sport mınıstrligi júıeli jumys isteýi tıis.
M. Áshimbaev «Mádenı mura» baǵdarlamasy aıasynda Táýelsizdigimizdiń 20 jyldyǵyna tamasha tartý jasaý qajettigin atap ótti. «Táýelsizdigimizdiń 20 jyldyǵy kele jatyr. Sondyqtan osy aıtýly merekege deıin «Mádenı mura» baǵdarlamasy aıasynda sheshilmegen dúnıelerdi tııanaqtap, durystap, qorytyndylar jasap, Táýelsizdigimizdiń 20 jyldyǵyna úlken syı jasaý qajet. Kórmeler uıymdastyrý, kitaptar shyǵarý máselesin oılastyrý kerek. Bul úlken áńgimeniń taqyryby. Oǵan baılanysty jıyndar ótkizetin bolamyz», dedi ol.
