«Mádenı mura» baǵdarlamasy aıasynda 7 tarıhı eskertkishti qalpyna keltirý jumystary aıaqtalyp, memlekettik komıssııaǵa ótkizildi

Bul týraly búgin elordada ótken 2009-2011 jyldarǵa arnalǵan «Mádenı mura» strategııalyq ulttyq jobasy júzege asyrý jónindegi qoǵamdyq keńestiń qorytyndy otyrysynda «Qazqaıtajańǵyrtý» RMK-niń dırektory Qanat Tuıaqbaev málim etti.

Onyń aıtýyna qaraǵanda, 2009-2011 jyldarǵa arnalǵan «Qazqaıtajańǵyrtý» RMK-niń josparynda 7 oblystyń aýmaǵynda ornalasqan 20 tarıhı nysanǵa jóndeý jumystary júrgizilgen. Olardyń keıbirindegi jumystar 1-2 jyl aıasynda ǵana emes, odan da erterek bastalǵan.

«Óıtkeni keıbir mádenı muralar tarıhı ortalyqtarǵa aınalǵan. Olar Turbat, Rýhanııat mádenı ortalyqtary, 5 mádenı muradan turatyn ári 13-17 ǵasyrlarǵa jatatyn Shaıan, Baba ata meshit-medireseleri jáne sol sııaqty úlken-úlken ortalyqtarǵa jınaqtalǵan rýhanı-sáýlet eskertkishteri. Sonyń ishinde bıyl sońǵy 2-3 jyldardyń ishinde atqarylǵan jumystardyń nátıjesinde 7 tarıhı-mádenı muranyń qurylys jumystary aıaqtalyp, memlekettik komıssııaǵa ótkizildi», - dedi ol.

Q.Tuıaqbaev óz sózinde baǵdarlama aıasynda júzege asyrylyp jatqan halyqaralyq jobalarǵa da toqtalyp, Damask qalasyndaǵy Ál-Farabı tarıhı mádenı ortalyǵy men kesenesiniń qurylysy kelesi jyly aıaqtalatynyn, al Sultan Beıbarystyń kesenesin qalpyna keltirý jumystarynyń bitip, osydan 3 aı buryn qabyldaý komıssııasyna tapsyrylǵanyn atap ótti. Sonymen qatar Tashkentte ornatylýy josparlanǵan Abaı eskertkishiniń de negizgi jumystary tolyǵymen aıaqtalǵanyn jetkizdi. Bul oraıda sózge aralasqan Mádenıet mınıstri Muhtar Qul-Muhammedtiń aıtýynsha, qazaqtyń uly aqynynyń eskertkishin resmı ashý saltanaty aǵymdaǵy jyldyń 10 jeltoqsanyna josparlanǵan eken. Degenmen, ózbek tarapynyń túrli sebepterdi alǵa tartýynan eskerkishtiń ashylý rásimi kelesi jylǵa syrǵytylǵan.

«Qazqaıtajańǵyrtý» RMK dırektorynyń atap ótýinshe, aǵymdaǵy jyly el aýmaǵyndaǵy 20-ǵa jýyq tarıhı mádenı murany qalpyna keltirý jumystaryna bıýdjetten 600 mln-ǵa jýyq qarjy bólingen. Kelesi jylǵa da qarjy mólsheri osy kólemde boljanyp otyr.