«Mádenı mura» aıasynda Uly Jibek joly boıyndaǵy tarıhı-mádenı eskertkishterdiń barlyǵy qaıta jóndelýi tıis - M. Qul-Muhammed
A. Qarashanyń 18-i. QazAqparat /Qanat Mámetqazyuly/ ‑«Mádenı mura» aıasyndaǵy bas jospar boıynsha Uly Jibek joly boıyndaǵy tarıhı-mádenı eskertkishterdiń barlyǵy júıeli túrde kezeń-kezeńimen jóndeýden ótkizilýi tıis.
Búgin QR Mádenıet jáne aqparat mınıstrliginiń keńeıtilgen alqa májilisi barysynda vedomstvo basshysy Muhtar Qul-Muhammed Elbasynyń atyna tikeleı jelide kelip túsken saýaldarǵa toqtala kele, osylaı málim etti, dep habarlaıdy QazAqparat.
«2003 jyly Memleket basshysynyń tikeleı tapsyrmasy boıynsha jasalǵan «Mádenı mura» baǵdarlamasy bastapqyda úsh jyldyq merzimge arnalǵan bolatyn. Biraq, ulttyq mádenıettiń damýyna kóp yqpal etetin mańyzdy baǵdarlama áli kúnge deıin jalǵasyp keledi. Elbasynyń tapsyrmasy boıynsha aldaǵy ýaqytta da bul shara jalǵasyn tabady. Bul shara aıasynda biz óz tarıhymyzda tuńǵysh ret Qazaqstannyń óz ishindegi tarıhı-mádenı eskertkishtermen birge, shet elderdegi ulttyq-mádenıetimizge qatysty tarıhı eskertkishterdi qaıta jóndeýden ótkizýdi qolǵa aldyq. Qazirgi málimetter boıynsha Damaskidegi Sultan Beıbarys kesenesine jóndeý jumystary aıaqtalýǵa jaqyn. Egıpet tarapymen birlese otyryp Kaır qalasyndaǵy Sultan Beıbarys meshitiniń jumystaryn da jalǵastyrýdamyz», dedi QR Mádenıet jáne aqparat mınıstri.
Sonymen birge, atalǵan baǵdarlama aıasyndaǵy mınıstrliktiń strategııalyq josparyna toqtalǵan M. Qul-Muhammed, bul rette aǵymdaǵy jyl sońyna deıin elimizdegi 8 tarıhı-mádenı eskertkishte jóndeý jumystary aıaqtalatynyn málim etti. «Budan basqa, «Mádenı mura» aıasynda bas jospar ázirleý qolǵa alynǵan bolatyn. Ol boıynsha Uly Jibek joly boıyndaǵy tarıhı-mádenı eskertkishterdiń barlyǵyn júıeli túrde kezeń-kezeńimen jóndeýden ótkizý josparlandy», dedi M. Qul-Muhammed.
