Mádenı-kópshilik sharalardy jeke kúzet qyzmeti qadaǵalaıtyn bolady - ІІM ókili
NUR-SULTAN. QazAqparat - QR Іshki ister mınıstrliginde eldegi jeke kúzet uıymdary men quqyq qorǵaý oryndarynyń birlesken jumysyn jetildirý máselesi talqylandy, dep habarlaıdy QazAqparat tilshisi.
QR Іshki ister mınıstriniń birinshi orynbasary Marat Qojaevtyń aıtýynsha, jeke kúzet qyzmetiniń 23 myń qyzmetkeri erikti negizde qoǵamdyq tártipti birlesip qadaǵalap otyr.
«Eldegi 252 jeke qyzmet uıymy qoǵamdyq tártipti birlesip kúzetýge 683 mobıldi top jasaqtaǵan.Onyń quramynda 2000-nan astam kúzetshi tartylǵan. Sonyń arqasynda ótken bir jyldyń ishinde 500- den astam qylmystyń, 10 myńnan astam ákimshilik quqyq buzýshylyqtyń beti ashyldy», - dedi Marat Qojaev.
ІІM ókiliniń aıtýynsha, 2019 jyldyń 4 aıynda kúzet qyzmetiniń kómegimen 254 qylmystyń, 441 urlyq áreketiniń joly kesilgen.
«Qazaqstan aýmaǵynda tirkelgen 5000-nan astam kúzet uıymynda 98 myń qyzmetker jumys isteıdi. ІІM eldegi 700-den astam kúzetiletin nysandy básekeli ortaǵa berýdi josparlap otyr. Mádenıet mınıstrligimen birge eldegi mádenı-kópshilik sharalarda qoǵamdyq tártipti kúzetýge jeke kúzet uıymdaryn tartý boıynsha quqyqtyq-normatıvtik aktilerge túzetýler engizip jatyrmyz.Sondaı-aq, bilim jáne ǵylym mınıstrligimen birge eldegi mektepterdi bilikti kúzet uıymdaryna berý sharalaryn pysyqtap jatyrmyz. Sondyqtan, jeke qyzmet uıymdarymen birlesken jumystardy áli de jetildire túsý qajet» - dedi mınıstrlik ókili.
