Mádenı is-sharalarǵa qatyspaıtyn úı sharýashylyqtarynyń úlesi joǵary deńgeıde qalyp otyr - Statıstıka
ASTANA. 23 qazan. QazAqparat - Statıstıka agenttiginiń aǵymdaǵy jyldyń tamyz aıynda Qazaqstandaǵy halyqtyń turmys sapasyna júrgizgen birjolǵy zertteý qorytyndylaryna qaraǵanda, elimizdegi mádenı is-sharalardyń qoljetimdiligi anyqtalyp, ol 73,6 paıyzdy qurady.
Eske sala keteıik, suraýǵa 12 myń úı sharýashylyqtarynyń basshylary qatysty. Bul týraly agenttiktiń baspasóz qyzmetinen habarlandy.
«Sondaı-aq bul rette mádenı is-sharalarǵa qatyspaıtyn úı sharýashylyqtarynyń úlesi joǵary deńgeıge ıe - 46,7 paıyz. Olardyń ishindegi 14,3 paıyzy mádenı mekemelerge barmaýdyń sebebi retinde osy ispettes is-sharaǵa qyzyǵýshylyqtarynyń joq ekendigin belgilegen», - delingen baspasóz habarlamasynda.
Sonymen qatar, suraý qorytyndylary boıynsha respondentterdiń 14,6 paıyzyn aýyz sýdyń sapasy, 33,6 paıyzyn úı sharýashylyqtaryn qorshaǵan ortanyń jaǵdaıy qanaǵattandyrmaıtyn bolyp shyqty. Bul rette olardyń úles salmaǵynyń kóp bóligi ózderiniń balalarynyń bolashaq ómirin pessımıstik turǵydan baǵalaǵan úı sharýashylyqtaryna keledi.
«Zertteý qorytyndylary boıynsha úı sharýashylyqtarynyń 4,4 paıyzy ózderin qaýipti sezinedi. Bul oraıda jeke qaýipsizdikke senim deńgeıi tabys deńgeıiniń azaıýyna qaraı tómendeıdi, ıaǵnı tómen tabysty úı sharýashylyqtary edáýir aýqattylarǵa qaraǵanda joǵary qaýipti sezinedi. Olarǵa kórsetilgen memlekettik qyzmetterdi usynýda qanaǵattaný deńgeıi boıynsha úı sharýashylyqtaryn bólý kezinde densaýlyq saqtaý júıesindegi, joǵary bilim beretin, sondaı-aq járdemaqy, zeınetaqy jáne ózge de áleýmettik tólemderdi taǵaıyndaıtyn uıymdardyń qyzmetterimen eń az qanaǵattanǵan. Bul oraıda memlekettik qyzmetterdiń sapasy men tıimdiligine barynsha qanaǵattanýdy joǵary tabysty úı sharýashylyqtary sezinetindigin atap ketý qajet», - delingen agenttik málimetterinde.
Sonymen qatar, úı sharýashylyqtary basshylarynyń 75,2 paıyzy óz ómirlerine qanaǵattanǵandyqtaryna qaramastan tek 53,5 paıyzy úı sharýashylyqtary ekonomıkanyń jaǵdaıyna qanaǵattaný deńgeıi boıynsha eldegi ekonomıkalyq jaǵdaıyn oń baǵalaǵan. Bul oraıda 24,5 paıyzy qanaǵattanbaǵandyqtaryn jáne 22 paıyzy jaýap berýge qınalǵandyqtaryn bildirgen. Bul rette memlekettik salymdardyń basym baǵyttary boıynsha suraqqa 40,1 paıyz úı sharýashylyqtary densaýlyq saqtaýdy, 20,4 paıyzy - bilim berýdi, 18,8 paıyzy - turǵyn úı qurylysyn belgilegen.
Toqtala ketetin jaıt, Statıstıka agenttiginiń zertteý quraly bolyp úı sharýashylyqtarynyń úsh tabys deńgeıi boıynsha mynalar anyqtaldy:
- tabystyń tómen deńgeıi (tipti tamaqqa da jetpeıdi; tamaqqa jetedi, biraq biz kıim satyp alý, páter aqy tóleýde qıyndyq kóremiz);
- tabystyń ortasha deńgeıi (tamaqqa jáne kıimge jetedi, biraq bizdiń uzaq ýaqyt paıdalanatyn taýarlardy satyp alýǵa múmkindigimiz joq; tamaqqa, kıimge jáne uzaq ýaqyt paıdalanatyn taýarlarǵa jetedi, biraq mashına, páter, saıajaı jáne taǵy basqa satyp alýǵa múmkindigimiz joq);
- tabystyń joǵary deńgeıi (barlyq qajettini satyp alýǵa jetkilikti).
