«Mádenı Azıada» aıasynda ótkizilgen sýretter men esselerdiń balalar arasyndaǵy halyqaralyq baıqaýynyń jeńimpazdary anyqtaldy

Bul týraly 7-Qysqy Azııa oıyndaryn uıymdastyrý jáne ótkizý jónindegi Astana qalalyq dırektsııasynan málim etti.

Jumystardy qabyldaý 1 jeltoqsan kúni aıaqtaldy. Baıqaýǵa barlyǵy 450 sýret pen esse kelip tústi. Balalar salǵan sýretterdiń deni «Men jáne Irbı» taqyrybyna arnalǵan. Uıymdastyrýshylardyń aıtýynsha, baıqaýda qazaqstandyqtarmen birge Malaızııa eliniń balalary belsendilik tanytqan. Aıta keteıik, balalar arasynda sýretter men esselerdiń baıqaýy - Azııa oıyndary sheńberinde uıymdastyrylatyn dástúrli halyqaralyq joba.

Qazylar alqasynyń quramynda QR eńbek sińirgen qaıratkeri, sýretshi Kamıl Mullashev, QR eńbek sińirgen qaıratkeri, ónertanýshy Valentın Pak, Qazirgi zamanǵy óner murajaıynyń dırektory Nellı Shıvrına boldy.

7-12 jasqa deıingi balalar arasyndaǵy eń úzdik sýrettiń avtory - Rámil Mýsın (Qazaqstan, Hromtaý qalasy), 13-16 jasqa deıingi eń úzdik sýrettiń avtory - Ahmad Ajmal Bin Ramlan (Malaızııa, Shah Alam qalasy) atandy.

Al esseler boıynsha baıqaýda 7-12 jasqa deıingi balalar arasynda Aıdan Eńbekbaı (Qazaqstan, Shymkent qalasy), 13-16 jasar jetkinshekter arasynda Jenny Cheah Mei Wan jeńimpaz boldy.

Jeńimpazdardy marapattaý 30 qańtar kúni Astanada ótedi. Barlyq qatysýshylar uıymdastyrýshylar atynan sertıfıkattar men kádesyılar alady. Tórt jeńimpaz 2011 jylǵy 30 qańtar kúni Astanada ótetin Oıyndardyń saltanatty ashylý rásimine shaqyrý bıletin alady. Onymen birge eń úzdik eki sýret pen esseniń avtorlary Mádenı Azıada jobasy aıasynda Astanada ótetin barlyq is-sharalarǵa qatysý múmkindigine ıe bolady.