«Mádenı Azıada» aıasynda «Kóshpendiler álemi» atty kontserttik shoý-baǵdarlama bolyp ótti
ASTANA. 4 aqpan. QazAqparat /Aınur Kenebaeva/ - «Mádenı Azıada» aıasynda «Kórme» kórme kesheninde «Kóshpendiler álemi» etnomádenı landshaftyq shoý jobasynyń qorytyndy kezeńine arnalǵan kontserttik shoý-baǵdarlama bolyp ótti.
Kórkem kontsert Astana qalasy ákimdigi mádenıet basqarmasynyń bastyǵy Bolat Majaǵulovtyń sózimen ashyldy.
«Bul shoý - qazaq halqynyń san ǵasyrlyq baı da asyl murasyn aıǵaqtaıtyn ári búgingi mádenıetimizdiń joǵarǵy deńgeıin kórsetetin kórinis», - dedi óz sózinde B.Majaǵulov.
QR Prezıdenttik mádenı ortalyǵynyń tuńǵysh ulttyq dástúrler teatry 3000 jyldyq tarıhy bar kóshpendiler órkenıeti mádenı murasynyń, aıryqsha ómir saltynyń injý-marjandaryn pash etken ulttyq salt dástúrlerge qatysty kórkem qoıylymdardy sahnalady.
Atalmysh joba aıasynda túrkilerdiń dástúrli saz óneri áýezdi órnekteriniń kórkemdigin aıǵaqtaıtyn kontsert, «Sheberler aýylyndaǵy» qaıtalanbas qolóner týyndylarynyń kórmesi, dala halqynyń atbegilik óneri men qyz uzatý, tusaý keser, shashý, otpen alastaý syndy qazaqtyń ulttyq salt-dástúrin beıneleıtin kórkem kórinister saltanatty túrde jurtshylyq nazaryna usynyldy.
«Kóshpendiler álemi» etnomádenı jobasy tamyry tereń tarıh tuńǵıyǵynda jatqan kóne túrki órkenıetiniń tynys-tirshiligi, bolmys-bitimi men rýhanı dúnıetanymynan syr shertetin dala dástúriniń búgingi kúngi mádenı aınasyna aınalyp, shet eldik qonaqtarǵa tarıhta qaıtalanbas qoltańbasy qalǵan qazaq mádenıetiniń álemdik órkenıet keńistigindegi aıryqsha ornyn áıgilep berdi.
