«Made in Kazakhstan with Italy» − Qazaqstan men Italııa qaı salalarda yntymaqtastyqty arttyrdy

ASTANA. KAZINFORM — Qazaqstan ózin tek resýrs jetkizýshi ǵana emes, Eýrazııanyń kólik, óndiristik jáne tehnologııalyq haby retinde kóredi. Bul týraly Saýda jáne ıntegratsııa mınıstri Arman Shaqqalıev «Qazaqstan — Italııa» bıznes-forýmynyń paneldik sessııasynda aıtty. 

Mınıstr elimizdiń halyqaralyq jetkizý tizbekterinde ornyqty, tsıfrlyq jáne ártaraptandyrylǵan sheshimder usynýǵa qabiletti ekenin atap ótti.

− Teńizge tikeleı shyǵatyn joly joq el retinde Qazaqstan árdaıym balama logıstıkalyq baǵyttardy izdeıdi. Osy rette Transkaspıı halyqaralyq kólik baǵytyna (Orta dáliz) erekshe nazar aýdarylyp otyr. Logıstıkalyq tizbekterdiń qaıta qurylýy arqyly bul dáliz Soltústik baǵytqa balama retinde mańyzdy strategııalyq rólge ıe boldy. 2024 jyly júk tasymaly kólemi 63%-ǵa ósip, 4,1 mln tonna boldy, al konteınerlik tasymaldar 2,6 ese ulǵaıyp, 50,5 myń JFE-ǵa jetti. Bul — kórsetkishterdiń aıtarlyqtaı jaqsarǵanyn bildiredi, − dedi Arman Shaqqalıev.

Arman Shaqqalıev Italııanyń mashına jasaý, ónerkásiptik dızaın, agroónerkásip jáne energetıkalyq tehnologııalar salalarynda álemdik kóshbasshy ekenin aıtty.

− Biz munda erekshe sınergııany kórip otyrmyz: Italııanyń tehnologııalyq jáne ınvestıtsııalyq áleýeti Qazaqstannyń resýrstyq bazasymen, logıstıkalyq ınfraqurylymymen jáne strategııalyq ornalasýymen úılesip, úlken múmkindikter týǵyzady. 2024 jyly eki el arasyndaǵy taýar aınalymy 19,9 mlrd dollarǵa jetip, 24%-ǵa artty. Onyń ishinde Qazaqstannan eksport — 18,7 mlrd dollardy qurady. Negizgi eksporttyq taýarlar — munaı, ferroqorytpalar, alıýmınıı jáne aýyl sharýashylyǵy ónimderi. Italııadan ımport kólemi 1,3 mlrd dollar boldy jáne negizinen mashına jasaý ónimderi, medıtsınalyq preparattar men ónerkásiptik jabdyqtardan quraldy, − dep tolyqtyrdy ol.

Alaıda, bul kórsetkishter ekijaqty saýda-ekonomıkalyq áleýettiń tek bir bóligin ǵana kórsetedi. Búgingi forým qarym-qatynasty jańa deńgeıge shyǵaryp, shıkizatty tereń óńdeý, birlesken óndiris pen joǵary tehnologııalyq kásiporyndardy jergilikti jerde damytýǵa baǵyttalǵan jańa seriktestik kezeńin bastaýǵa yqpal etpek.

Perspektıvaly baǵyttar qatarynda Qazaqstan-Italııa bastamalaryn qoldaıtyn ınvestıtsııalyq qor qurý, «Digital Supply Chain 4.0» tsıfrlyq platformasyn damytý, eksporttyq jáne ınvestıtsııalyq syn-qaterdi birlesip saqtandyrý, bolashaq jobalardyń zamanaýı ekologııalyq jáne áleýmettik standarttarǵa saı bolýyn qamtamasyz etetin ESG jol kartasyn jasaý bar.

Qazaqstan tarapynan usynylǵan negizgi bastamalardyń biri — «Made in Kazakhstan with Italy» birlesken brend qurý ıdeıasy boldy. Bul brend tereń tehnologııalyq kooperatsııanyń jáne joǵary básekege qabiletti ónimdi birlesip óńdeý men eksporttaýǵa kóshý úrdisiniń sımvolyna aınala alady.

Sonymen birge, agroónerkásiptik kooperatsııa da basty nazarda boldy. Qazaqstan organıkalyq bıdaı, maıly daqyldar men mal azyǵyn eksporttaýdy ulǵaıtýǵa daıyn ekenin bildirip, halyqaralyq naryqqa baǵyttalǵan biryńǵaı brendpen aýyl sharýashylyǵy ónimderin birlesip óńdeý jáne býyp-túıý jelilerin qurýdy usyndy.

Buǵan deıin premer-mınıstri Oljas Bektenov Qazaqstan men Italııa arasyndaǵy ekijaqty taýar aınalymy 20 mlrd dollarǵa jýyqtaǵanyn aıtqan edi.

Qazaqstan men Italııa arasynda 180 mıllıon eýroǵa memorandýmdar bekitildi.

Sondaı-aq, Astana — Mılan tikeleı reısi ashylatyn boldy.