Madagaskardaǵy Gamane tsıklonynan 14 adam qaza tapty
ASTANA. KAZINFORM – Madagaskardyń soltústiginde «Gamane» tsıklony soǵyp, 14 adam qaza taýyp, júzdegen úı qırady. Bul týraly Madagaskardyń ulttyq Táýekelder men tabıǵı apattardy basqarý basqarmasy habarlady.
Sınhýa aqparat agenttiginiń málimetinshe, dúleı daýyl sársenbi kúni tańerteń Madagaskardyń soltústik shetinde bolǵan. Jeldiń ortasha jyldamdyǵy – 150 km/saǵat, al ekpini 210 km/saǵat. Tsıklon saldarynan atalǵan aımaqta tolassyz jańbyr jaýǵan.
Tabıǵat apatynan eldiń jeti oblysynda barlyǵy 36 307 adam, onyń ishinde 9 024 úı sharýashylyǵy zardap shekti. 18 565 adam evakýatsııalandy. Tsıklonnan keıingi sý tasqyny 6 675 úı men 1 698 kúrish alqabyn sý astynda qaldyryp, úlken shyǵynǵa ushyratty. 617 úı qırap qaldy.
Úndi muhıtyndaǵy araldyń soltústiginde soqqan tsıklonnan keıin úılerdi sý shaıyp, joldardy buzyp ótken. Zalaldyń tolyq kólemi áli belgisiz, óıtkeni aımaqtaǵy kóptegen aýylmen baılanys úzilgen.
Meteorologtar Gamane tsıklony juma kúni tústen keıin araldan ketedi dep boljam jasap otyr.
Afrıkanyń ońtústik-shyǵys jaǵalaýynda ornalasqan Madagaskarda mundaı jaǵdaılar jıi bolady. Bir jyl buryn «Freddı» tropıkalyq tsıklony atalǵan elde, sondaı-aq kórshiles qurlyqtaǵy Mozambık pen Malavıge de qaýip tóndirgen edi. Ol kezde 500-den astam adam qaıtys boldy.
