Madagaskarda «Gezanı» tsıklonynan qaza tapqandar sany 59-ǵa jetti

ASTANA. KAZINFORM - Ótken aptada Madagaskar aýmaǵyn sharpyǵan tropıkalyq «Gezanı» tsıklony saldarynan qaza tapqandar sany 59 adamǵa jetti. Bul týraly Reuters agenttigi eldiń Táýekelder men tabıǵı apattardy basqarý jónindegi ulttyq bıýrosyna (BNGRC) silteme jasap habarlady, dep jazady khovar.tj.

BNGRC deregine sáıkes, 15 adam habar-osharsyz ketken, 804 turǵyn túrli deńgeıde jaraqat alǵan. Tabıǵı apattan zardap shekkenderdiń sany 423 myńnan asty. Shamamen 16 myń adam baspanasyn tastap ketýge májbúr bolǵan.

Bılik ókilderi aýa raıy jaǵdaıyn baqylaýda ustap otyr. Araldyń ońtústik-batysyndaǵy Ampanıhı qalasy mańynda «qyzyl» qaýip deńgeıi jarııalandy. 16 aqpanda tsıklon jaǵalaýdan shamamen 100 shaqyrym qashyqtyqtan ótip, saldarynan saǵatyna 65 shaqyrymǵa jýyq jyldamdyqpen jel soqqan.

Buǵan deıin «Gezanı» tsıklony Madagaskarǵa «Fıtııa» tsıklonynan keıin araǵa eki apta da salmaı soqqany habarlanǵan.

Sınoptıkterdiń málimetinshe, daýyl oshaǵynda jeldiń jyldamdyǵy saǵatyna 250 shaqyrymǵa deıin jetken. Tabıǵı apat aýqymdy sý tasqyndaryn, elektr energııasynyń úzilýin jáne eleýli qıratýlardy týǵyzdy.

Osyǵan deıin Portýgalııadaǵy daýyl 16 adamnyń ómirin qıǵany týraly jazdyq.