Madagaskarda adam saýdasymen aınalysqan Qytaı azamattary ustaldy

ASTANA. KAZINFORM — Madagaskar polıtsııasy halyqaralyq neke arqyly adam saýdasymen aınalysqan qylmystyq topty áshkerelep, birneshe Qytaı azamatyn ustady, dep habarlandy Madagaskardaǵy Qytaı elshiliginiń resmı saıtynda.

Qytaı elshiligi 12 naýryz kúni jarııalaǵan málimdemede Madagaskar polıtsııasynyń adam saýdasy boıynsha birqatar qylmysty ashqany jáne qylmysqa qatysy bar Qytaı azamattaryn tutqyndaǵany aıtylǵan.

Qytaı elshiligi zańsyz áreketterdiń kez kelgen túrine qarsy ekenin jáne Madagaskar kúshtik qurylymdarynyń adam saýdasymen kúresý maqsatynda qoldanǵan sharalaryn qoldaıtynyn málimdedi. Sonymen qatar, Qytaı azamattaryna halyqaralyq nekege qatysty zań talaptaryn qatań saqtaýdy eskertti.

Málimdemede aıtylǵandaı, Qytaı zańnamasyna sáıkes, kez kelgen neke agenttigi el azamattaryna sheteldiktermen nekege turý maqsatynda jeńgetaılyq qyzmet kórsete almaıdy. Jeke tulǵalardyń alaıaqtyq jolymen nemese paıda tabý maqsatynda halyqaralyq neke deldaldyǵymen aınalysýyna da qatań tyıym salynǵan.

Sonymen qatar, Qytaı elshiligi Madagaskar zańyna sáıkes, shetel azamattary elge kirgennen keıin vıza sanatyna sáıkes kelmeıtin qyzmetpen aınalysa almaıtynyn eske saldy.

Madagaskardyń vızalyq júıesinde «neke qııý» maqsatynda arnaıy vıza qarastyrylmaǵan, al áýejaıda rásimdeletin vızalar tek týrıstik maqsatta ǵana beriledi.

Osyǵan oraı, Qytaı azamattaryna qolyndaǵy vızasynyń sanatyn jáne onyń qandaı maqsatqa sáıkestigin muqııat tekserý, sondaı-aq vızanyń jaramdylyq merzimi aıaqtalǵanǵa deıin elden shyǵý qajettiligi eskertildi.

Buǵan deıin habarlanǵandaı, Soltústik Koreıanyń 20 teńizshisi Qytaı aýmaǵynda keme apatynan qaza tapqan.