Madagaskar ýaqytsha prezıdentin taǵaıyndady

ASTANA. KAZINFORM – Madagaskardyń Konstıtýtsııalyq soty 51 jastaǵy polkovnık Maıkl Randrıanırınany ýaqytsha prezıdent retinde ant qabyldatty, dep habarlaıdy DW.

Áskerı tóńkeristen keıin birneshe kún ótken soń eldi basqarý tizgini Randrıanırınaǵa ótti. Konstıtýtsııalyq sot 17 qazanda ony «respýblıkany qaıta jańǵyrtý maqsatyndaǵy ótpeli kezeń prezıdenti» retinde bekitti. Buǵan deıin 14 qazanda Capsat arnaıy áskerı jasaǵy bılikti basyp alǵanyn jarııalaǵan edi.

Randrıanırına saılaýdy 1,5-2 jyldan keıin ótkizýdi josparlap otyrǵanyn málimdedi. Ol sottyń 60 kún ishinde saılaý uıymdastyrý talabyn oryndaýdan bas tartyp, aldymen elde aýqymdy reformalar júrgizý qajettigin atap ótti.

Óz sózinde Maıkl Randrıanırına bul oqıǵany «tarıhı betburys» dep sıpattap, áleýmettik jáne ekonomıkalyq qıyndyqtarǵa tap bolǵan jastardyń talaptaryn eskerýge ýáde berdi. Inaýgýratsııa rásimine joǵary shendi áskerıler, saıasatkerler, jastar uıymdarynyń ókilderi men Germanııa, Frantsııa, AQSh, Qytaı jáne Reseı dıplomattary qatysty.

Burynǵy prezıdent Andrı Radzýelına narazylyqtardan keıin elden ketip, parlament sheshimimen bılikten shettetildi. BAQ dereginshe, ol qazir Dýbaıda. Onyń jaqtastary Radzýelına ózin áli de zańdy memleket basshysy dep sanaıtynyn aıtady. Ol 2009 jyly bılikke áskerı tóńkeris nátıjesinde kelgen jáne 2019 jyldan beri eldi basqarǵan bolatyn.

Madagaskar halqynyń 80 paıyzy kedeıshilik sheginde ómir súredi. Afrıkanyń ońtústik-shyǵys jaǵalaýyndaǵy bul aral memleket aýmaǵy jaǵynan Italııadan eki ese úlken, alaıda halqy shamamen 30 mıllıon adam ǵana. El vanıl eksporttaý boıynsha álemde birinshi orynda.

Qyrkúıek aıynyń sońynan bastap myńdaǵan jastar prezıdenttiń otstavkasyn talap etip, kóshege shyqqan. Keı jerlerde zorlyq-zombylyqqa ulasqan bul narazylyqtarǵa elektr men aýyzsýdyń tapshylyǵy, bilim berý júıesindegi daǵdarys, jumyssyzdyq pen kedeıshilik túrtki boldy.