Madagaskar prezıdentine jasalmaq bolǵan kezekti qastandyqtyń joly kesildi
ASTANA. KAZINFORM – Madagaskardyń prezıdenttik gvardııasy eldiń ýaqytsha basshysy Maıkl Randrıanırınaǵa jasalmaq bolǵan qastandyq áreketiniń jolyn kesti, dep habarlaıdy Anadolu.
Prezıdent ákimshiliginiń málimetine súıensek, 3 shilde kúni keshke el astanasy Antananarıvý qalasynyń Ivandrı aýdanynda rezıdentsııasyna qaıtyp kele jatqan memleket basshysy kortejiniń sońynan ergen eki ushqyshsyz ushý apparaty anyqtalǵan. Aldyn ala málimet boıynsha, drondar jarylǵysh qurylǵylarmen jabdyqtalǵan bolýy múmkin.
Prezıdent gvardııasy drondarǵa oq atqannan keıin olar bıiktep, oqıǵa ornynan ushyp ketken.
Maıkl Randrıanırına rezıdentsııasyna aman-esen jetti. Oqıǵa bolǵan aýdanda qaýipsizdik sharalary kúsheıtilip, drondardyń shyǵý tegin anyqtaý úshin quqyq qorǵaý organdary tergeý bastady.
Prezıdent ákimshiliginiń málimetinshe, bul sońǵy birneshe aıda ýaqytsha memleket basshysyna jasalmaq bolǵan úshinshi qastandyq áreketi.
Bıyl 15 sáýirde prezıdent rezıdentsııasynyń ústinen jylý baqylaý qurylǵylarymen jabdyqtalǵan bes dron anyqtalyp, zalalsyzdandyrylǵan edi. Osydan keıin bılik prezıdentke qastandyq jasalýy múmkin ekenin málimdegen.
Sondaı-aq bıyl 3 sáýirde Antananarıvý qalasynda polkovnık Patrık Rakotomamonjı men birneshe ofıtserdi qosa alǵanda 11 adam ustaldy. Olarǵa prezıdentke qastandyq jasaýǵa daıyndalý, memlekettik tóńkeris jasaýǵa árekettený, qylmystyq uıym qurý jáne qarýdy zańsyz saqtaý aıyptary taǵylǵan.
Eske salsaq, Maıkl Randrıanırına Madagaskardy 2025 jylǵy qazandaǵy jappaı narazylyqtar men saıası daǵdarystan keıin áskerı kúshter bılikti óz baqylaýyna alǵan soń basqarýǵa kelgen. Sol jylǵy 17 qazanda ol Konstıtýtsııalyq sotta ant berip, eldiń ýaqytsha prezıdenti qyzmetine kiristi.
