Madagaskar prezıdentin qyzmetinen bosatý úshin parlamenttiń 130 múshesi daýys berdi

ASTANA.KAZINFORM — Madagaskardyń Ulttyq assambleıasy (parlamenttiń tómengi palatasy) prezıdent Andrı Radzýelınany bılikten ketirý týraly sheshim qabyldady, dep habarlaıdy TASS. 

Qatysqan 131 depýtattyń 130-y otstavka úshin daýys bergen. Olardyń qatarynda bıliktegi «Andrı Radzýelınamen birge» partııasynyń ókilderi de bar ekenin Orange portaly jazdy.

Buǵan deıin prezıdent parlamenttiń tómengi palatasyn taratý týraly sheshim qabyldaǵan, alaıda depýtattar bul sheshimdi zańsyz dep tanydy.

Radzýelına oppozıtsııa bastamasymen shaqyrylǵan Ulttyq assambleıanyń kezekten tys sessııasyn «zańdyq negizi joq jáne Konstıtýtsııaǵa qaıshy» dep atady.

Eldegi saıası daǵdarys 25 qyrkúıekte bastaldy. Elektr jáne sý tapshylyǵyna qarsy shyqqan jastardyń narazylyǵy birtindep prezıdenttiń otstavkasyn talap etken aktsııalarǵa ulasty.

Prezıdent Radzýelına oppozıtsııamen dıalogqa daıyn ekenin málimdegenimen, qyzmetinen ketýden bas tartty. Ol «qaýipsiz jerde» ekenin jáne eldi qashyqtan basqaryp otyrǵanyn habarlaǵan.

Reuters agenttiginiń málimetinshe, narazylyq bildirýshilerdi qoldaǵan bir top áskerı bılikti óz qolyna alǵanyn jarııalady. Polkovnık Maıkl Randrıanırına malagasıı radıosynda sóılegen sózinde:

— Biz bılikti óz qolymyzǵa aldyq, — dep málimdedi.

Onyń aıtýynsha, bıliktiń barlyq qurylymy taratylyp, tek Ulttyq assambleıa ǵana óz jumysyn jalǵastyrady.

Aıta ketsek, Radzýelına bılikke alǵash ret 2009 jyly dál osy áskerı qurylym — Qurlyq áskerleri kadrlyq basqarmasy (CAPSAT) qoldaýymen kelgen edi. Ol kezde Radzýelına oppozıtsııa lıderi retinde sol kezdegi prezıdent Mark Ravalýmananǵa qarsy shyqqan bolatyn.

Buǵan deıin prezıdent eldegi jappaı narazylyqtar kezinde Madagaskardan ketip qalǵany habarlanǵan.