Madagaskar prezıdenti bılikti áskerıler basyp almaq bolǵanyn málimdedi

ASTANA. KAZINFORM – Madagaskar prezıdenti Andrı Radzýelına ákimshiligi elde bılikti zańsyz, Konstıtýtsııaǵa qaıshy basyp alý áreketi júrip jatqanyn málimdedi, dep habarlaıdy BBC.

CAPSAT (áskerı kadr jáne ákimshilik-tehnıkalyq qyzmetter korpýsy) degen ataýmen belgili armııa bólimshesi áskerı qolbasshylyqty óz qolyna alǵanyn, endi ol qurlyqtyq, áýe jáne áskerı-teńiz sııaqty barlyq áskerı qurylymdardy basqaratynyn málimdegen.

Eń qyzyǵy, tap osy bólimshe Madagaskarda 2009 jyly bolǵan saıası daǵdarys kezinde sheshýshi ról atqaryp, Radzýelınanyń bılik basyna kelýine negiz bolǵan.

Madagaskarda alǵashqy narazylyq aktsııalary 25 qyrkúıekte bastaldy. Bastapqyda turǵyndar sý men elektr energııasynyń óshirilýine qarsy shyqqanymen, keıin bul qozǵalys jumyssyzdyqtyń joǵary deńgeıi, sybaılas jemqorlyq jáne ómir súrý qunynyń ósýine baılanysty úkimetke qarsy keń aýqymdy narazylyqqa ulasty.

Senbi kúni el astanasy Antananarıvýdiń shetinde ornalasqan áskerı bólimderdiń keıbir sarbazdary kazarmalaryn tastap, qala ákimdigi aldynda jınalǵan demonstranttarǵa qosyldy.

Madagaskar Qarýly kúshteriniń arnaıy parashıýttik bólimshesi – CAPSAT – sońǵy kúnderi Antananarıvýdaǵy narazylyqtardy taratý kezinde qaýipsizdik kúshteriniń kúsh qoldanýyn aıyptady.

Prezıdent ákimshiligi senbi kúni taratqan málimdemesinde memleket basshysy Andrı Radzýelına men ótken aptada taǵaıyndalǵan jańa premer-mınıstr, armııa generaly Rýfın Zafısambo eldegi jaǵdaıdy tolyq baqylaýda ustap otyrǵanyn habarlady.

Osyǵan deıin Madagaskar prezıdenti úkimetti taratý týraly sheshimin jarııalaǵany týraly jazdyq.