Madagaskar áskerıleri alqaly basqarý organyn qurdy

ASTANA. KAZINFORM — Madagaskarda 14 qazanda bılikke kelgen áskerıler alqaly basqarý organy — Prezıdent janyndaǵy reformalar keńesi qurylǵanyn jarııalady, dep habarlaıdy L’Express de Madagascar basylymy.

Keńesti polkovnık Maıkl Randrıanırına basqarady. Basqarýshy organnyń tolyq quramy áli jarııalanǵan joq. Onyń quramynda qazirdiń ózinde armııa men jandarmerııa ókilderi bar. Bolashaqta beıbit turǵyndar da qosylýy múmkin.

Basylymnyń habarlaýynsha, jańa konstıtýtsııa qabyldanǵanǵa deıin bul elde mazmuny áli jarııalanbaǵan «Madagaskar Respýblıkasynyń ótpeli kezeńiniń hartııasy» basqarylady.

Maıkl Randrıanırına sonymen qatar ótpeli joǵarǵy sot organy retinde Joǵary reformalar sotyn qurý týraly habarlady. Bul sot eki jyl ishinde memlekettiń konstıtýtsııalyq negizderine sholý jasap, jańa konstıtýtsııa boıynsha referendým uıymdastyryp, jalpyhalyqtyq saılaý ótkizedi.

Birneshe kún buryn Madagaskar prezıdenti Andrı Radzýelına narazylyq sherýlerinen keıin elden qashyp ketti.

Gen Z Mada ınternet-jastar qozǵalysy kúndelikti sý men elektr qýatynyń úzilýine qarsy narazylyq aktsııasyn uıymdastyrdy. Madagaskardaǵy alǵashqy narazylyq sherýleri 25 qyrkúıekte bastaldy, keıin demonstratsııalar jumyssyzdyqtyń, jemqorlyqtyń jáne ómir súrý qunynyń ósýine baılanysty prezıdent Andrı Radzýelına úkimetine narazylyqqa ulasty.

Keıinirek Madagaskar áskerıleri bılikti basyp alǵanyn jarııalady.

Áskerıler bılikti basyp alǵanyn jarııalaýdan birneshe mınýt buryn parlament músheleri Andrı Radzýelınany qyzmetinen bosatýǵa daýys berdi.