ІІM júrgizýshilerdiń medıtsınalyq tekserýine qatysty ózgeristi túsindirdi
ASTANA. KAZINFORM — Іshki ister mınıstrligi «Jol júrisi týraly» zańdaǵy ózgeristerge túsinikteme berdi.
Júrgizýshilerdiń medıtsınalyq tekserýden ótýine qandaı ózgerister engizildi?
— Júrgizýshilerdiń medıtsınalyq tekserýden ótý talaby jańa talap emes. Bul norma 2014 jyldan beri «Jol júrisi týraly» zańda kórsetilgen. Qazir Densaýlyq saqtaý mınıstrligi men Іshki ister mınıstrliginiń aqparattyq júıeleri ózara biriktirildi. Sonyń arqasynda mindetti medıtsınalyq tekserýden ótkeni týraly málimetter eki mınıstrliktiń júıeleri arasynda avtomatty túrde beriledi, — dedi ІІM ákimshilik polıtsııa komıteti tóraǵasynyń orynbasary Quralaı Karına.
65 jastan asqan júrgizýshiler neni bilýi kerek?
— 65 jastan asqan jáne múgedektigi bar júrgizýshilerge tek ár eki jyl saıyn medıtsınalyq tekserýden ótse jetkilikti. Onyń nátıjesi avtomatty túrde júıege túsedi. Sondyqtan eshqandaı qosymsha anyqtama jınaýdyń nemese memlekettik organdarǵa baryp júrýdiń qajeti joq. Sondaı-aq júrgizýshi kýáliginiń merzimin uzartý nemese bul týraly ІІM-ge jeke habarlaý talap etilmeıdi. Azamattarǵa alańdaýǵa esh negiz joq. Eshqandaı jańa talap nemese artyq qujat rásimdeý engizilgen joq. Barlyǵy burynǵydan da yńǵaıly jáne qarapaıym túrde, — dedi spıker.
Áleýmettik jelide aqparat taratý týraly.
— Blogerler men aqparattyq paraqsha ıelerine jalǵan aqparat taratqany úshin zańda jaýapkershilik bar ekenin eskertemiz. Sondyqtan aqparatty taratpas buryn onyń durystyǵyna kóz jetkizýdi suraımyz. Sebebi jalǵan málimetter halyqty shatastyrýy múmkin. Sondyqtan tek memlekettik organdardyń resmı aqparattaryna senýge keńes beremiz. Qajet bolǵan jaǵdaıda túsindirme berýge árdaıym daıynbyz, — dedi polıtsııa polkovnıgi.
Aıta ketelik Astanada jol erejesin 87 ret buzǵan júrgizýshi qamaýǵa alynǵan edi.
