ІІM JSN-di ózgertýge qatysty aqparatty túsindirdi
ASTANA. KAZINFORM — Áleýmettik jelilerde JSN-di ózgertýge bolady degen mazmunda aqparat taraýyna baılanysty, ІІM túsinikteme berdi. Bul týraly Polisia.kz jazdy.
— Azamattar zańnama talaptaryna sáıkes ýákiletti organdarǵa júginý arqyly ózderiniń aty-jónin jáne basqa da derbes derekterin ózgertýge quqyly. Alaıda ІІM naqtylaǵandaı, JSN azamatqa bir ret beriledi jáne qaıta ózgertilmeıdi, — delingen habarlamada.
Aıta keteıik, Qazaqstanda azamat aty-jónin ózgertken jaǵdaıda onyń jeke sáıkestendirý nómiri (JSN) ózgermeıdi. Bul týraly QR Ádilet mınıstrliginiń Tirkeý qyzmeti jáne zańgerlik qyzmetter kórsetýdi uıymdastyrý komıteti tóraǵasynyń orynbasary Dıas Sháripbaı Kazinform agenttiginiń resmı saýalyna bergen jaýabynda aıtqan bolatyn.
Azamatqa jańa qujat berilgen saıyn JSN qaıta berilmeıdi, ıaǵnı aty-jónin ózgertip, qujattaryn jańartqan jaǵdaıda da burynǵy JSN-i saqtalatyny habarlanǵan edi. Tek bala asyrap alý jáne JSN-di esepteý kezinde qate ketken jekelegen jaǵdaılarda ǵana jańa nómir berilýi múmkin. Osylaısha, azamat atyn, tegin nemese ákesiniń atyn ózgertkennen keıin de memlekettik tsıfrlyq júıelerde burynǵy JSN-i arqyly sáıkestendiriledi.
