M. Joldasbekov QR Prezıdenttigine kandıdattyń memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy bolyp saılandy
ANA. 7 aqpan. QazAqparat /Qanat Mámetqazyuly/ - Búgin Ortalyq saılaý komıssııasynda QR Prezıdenttigine kandıdattyń memlekettik tildi erkin meńgergendigin anyqtaý jónindegi lıngvıstıkalyq komıssııanyń alǵashqy otyrysy bolyp ótti.
Jıyn barysynda lıngvıstıkalyq komıssııanyń tóraǵasy bolyp Myrzataı Joldasbekov, al komıssııa hatshylyǵyna Faýzııa Orazbaeva saılandy.
Esterińizge sala keteıik, lıngvıstıkalyq komıssııanyń jańa quramy búgin Ortalyq saılaý komıssııasynyń otyrysynda arnaıy qaýlysymen bekitilgen bolatyn. Komıssııa quramy elimizge tanymal til men ádebıet salasynyń mamandarynan quraldy. Atap aıtqanda olar: Eýrazııa ulttyq ýnıversıtetiniń túrkitaný kafedrasynyń meńgerýshisi, Túrik álemi Aqsaqaldar keńesiniń tóraǵasy, fılologııa ǵylymdarynyń doktory, professor Myrzataı Joldasbekov, Eýrazııa ulttyq ýnıversıtetiniń prorektory, fılologııa ǵylymdarynyń doktory, professor Dıqan Qamzabekuly, QR Bilim jáne ǵylym mınıstrligi M. Áýezov atyndaǵy Ádebıet jáne óner ınstıtýtynyń dırektory, fılologııa ǵylymdarynyń doktory, QR Memlekettik syılyqtyń laýreaty Seıit Qasqabasov, QR Bilim jáne ǵylym mınıstrligi A. Baıtursynuly atyndaǵy Til bilimi ınstıtýtynyń dırektory, fılologııa ǵylymdarynyń doktory Sherýbaı Qurmanbaıuly, Abaı atyndaǵy Almaty Memlekettik ýnıversıtetiniń qazirgi qazaq tili teorııasy men ádistemesi kafedrasynyń meńgerýshisi, fılologııa ǵylymdarynyń doktory Faýzııa Orazbaeva.
Toqtala ketetin jaıt, kandıdattyń memlekettik tildi erkin meńgergenin anyqtaý rásimi de OSK qaýlysymen bekitiledi. Zańǵa sáıkes, kandıdattyń memlekettik tildi erkin meńgerýin anyqtaý azamattyń qajetti qujattardy OSK-ǵa tapsyrǵan sátten bastap, 5 kún ishinde júrgiziledi. Kandıdattar komıssııa usynǵan taqyryp boıynsha kólemi 2 betten aspaıtyn jazbasha tapsyrmany oryndaıdy, 3 betten aspaıtyn mátindi oqyp, kópshilik aldynda 15 mınýttan kem bolmaıtyndaı sóz sóıleýi boıynsha da synaqtan ótedi.
