M.Joldasbekov aqyn O.Súleımenovtiń ǵylymı erligin atady
ASTANA. QazAqparat - Oljas Súleımenov azamattyq, adamzattyq poezııany ǵana jasaýshy emes, has zertteýshi, zamanymyzdyń ǵulamasy. Bul pikirdi búgin L.Gýmılev atyndaǵy Eýrazııa ulttyq ýnıversıtetinde ótip jatqan aqyn Oljas Súleımenovtiń 80 jasqa tolýyna arnalǵan «Álem adamy» atty forýmda memleket jáne qoǵam qaıratkeri Myrzataı Joldasbekov bildirdi.
«Oljas Súleımenov azamattyq, adamzattyq poezııany ǵana jasaýshy emes, tapqyr, dálmar, sheshen ǵana emes, tereń zertteýshi, has zertteýshi, zamanymyzdyń ǵulamasy. Onyń «1001» sóz atty aıtýly zertteýinen bastap, ata-babamyzdyń túp tamyrynan bastap tereń zerttep, tereń úńilip jazǵan tarıhı eńbekterine bizdiń ǵalymdarymyzdyń áli tisi bata qoıǵan joq. Jap-jas Oljastyń orys tarıhy jónindegi tereń zertteýlerine, ózine deıingi ǵalymdardyń aıta almaǵanyn aıtqanyna, sóıtip orys ǵalymdaryn púshaıman qylǵanyna, tyń oılarymen dáýirdi dúr silkindirgen talantyna áli kúnge deıin tańdanyp júremin», - dedi M.Joldasbekov.
Sonymen qatar ol O.Súleımenovtiń eńbekteri orystyń men-men degen akademıkteriniń oıyn oıran, basyn dal qylǵandyǵyn atap ótti.
«Ǵylymdaǵy erlik dep mine osyny aıtady. Oljastyń bir aýyz sózine tatymaıtyn, birdeńe jazǵansyp, ǵylym doktory, pálenniń akademıgi, túgenniń akademıgimin dep júrgen adamdar bizderde jetedi. Men bul ataqtardy eshkimnen de qyzǵanbaımyn. Biraq, ádiletsizdigi sol, bizdiń kóptegen ǵalymdar ǵalym degen ataqty óziniń bıik dárejesinde ustaı almaı júr», - dedi ol.
