M. Joldasbekov, A. Áshimov syndy el aǵalary Aqseleý Seıdimbekti eske alýǵa arnalǵan bılıardtan týrnırde kúsh synasady
ALMATY. 15 maýsym. QazAqparat - Astanada 23 maýsym kúni «Zodıak» bılıard klýbynda atalmysh sport túrinen dástúrli týrnır ótedi.
Ol jýrnalıster kúnine jáne belgili ǵalym-pýblıtsıst Aqseleý Seıdimbektiń týǵanyna 70 jyl tolýyna oraılastyrylyp otyr. Jarysty Lev Gýmılev atyndaǵy Eýrazııa ulttyq ýnıversıtetiniń Jýrnalıstıka jáne saıasattaný fakýlteti, Jýrnalıstıka máselelerin zertteý ınstıtýty birlesip uıymdastyrýda. Oǵan A.Seıdimbektiń jaqyn týystary men áriptes dostary da shaqyrylyp otyr.
Týrnırge qatysýshylar jas shamasyna qaraı eki topqa bólinip ózara saıysqa túsetin bolady. Aldyńǵy aǵa býyn ókilderiniń tobyn Myrzataı Joldasbekov, Asanáli Áshimov sııaqty Ahańnyń zamandastary bastaıdy. Onda jarys jeńimpazdaryna uıymdastyrýshylar kýbok pen aqshalaı syılyq taǵaıyndap otyr. Sondaı-aq ártúrli atalymdar boıynsha arnaıy dıplomdar beriledi dep josparlanýda.
