ІІM joǵary oqý oryndaryna túsý úshin qandaı talaptar qoıylady
ASTANA. KAZINFORM – Іshki ister mınıstrligine qarasty joǵary oqý oryndarynda oqyp, quqyqtyq organdarda qyzmet etkisi keletin talapkerlerge arnalǵan erejeler bar. Talaptarmen tolyǵyraq Іshki ister mınıstrliginiń resmı ókili Shyńǵys Alekeshev tanystyrdy.
«Mınıstrliktiń joǵary oqý oryndaryna ishki ister organdarynyń qyzmetkerlerine qoıylatyn talaptarǵa saı keletin, áskerı qyzmetke jáne oqýǵa densaýlyǵy jaramdy jastar qabyldanady.
Oqýǵa tapsyrý úshin, maýsym aıyna deıin polıtsııa bólimderiniń kadr qyzmetine, turǵylyqty jeri boıynsha qylmystyq-atqarý júıesi departamentine nemese oqý ornynyń saıtyna ótinish beredi», - dedi Shyńǵys Alekeshev vedomstvoda ótken onlaın brıfıngide.
Sondaı-aq, talapker medıtsınalyq jáne psıhofızıologııalyq kýálandyrýdan, polıgrafta tekserýden ótýi kerek.
«Ulttyq biryńǵaı testileýde keminde 50 ball jınaýy qajet. Matematıka men oqý saýattylyǵynan keminde 3 ball jáne basqa pánder boıynsha keminde 5 ball bolýy tıis. Osydan keıin ǵana, ІІM joǵary oqý ornyndaǵy konkýrsqa qatysa alady. Konkýrstyń ashyqtyǵyn qamtamasyz etý maqsatynda byltyrdan beri talapkerlerdi irikteýdiń jańa formaty engizildi. Endi talapkerlerdiń ata-anasy men týystary áleýmettik jeli arqyly qabyldaý emtıhandaryn tikeleı efırde baqylaı alady», - deıdi ol.
Brıfıngide aıtylǵandaı, olımpıadalar men ǵylymı jobalardyń, sol sııaqty sporttyq jarystardyń jeńimpazdaryna basymdyq beriledi.
Atap aıtqanda:
- «Altyn belgi» ıegerleri;
- UBT-dan keminde 100 ball jınaǵandar;
- Ulttyq ulanda merzimdi áskerı qyzmet ótkerip, UBT-dan keminde 50 ball jınaǵandar. (ár pánnen keminde 3 upaıdan jınaý qajet);
- Qyzmettik mindetterin atqarý kezinde qaza tapqan nemese múgedek bolǵan qyzmetkerlerdiń balalary konkýrstan tys qabyldanady.
