ІІM joǵary oqý oryndaryna qujat qabyldaý tolyq tsıfrlyq formatqa kóshti
ASTANA. KAZINFORM – Іshki ister mınıstrliginiń vedomstvolyq joǵary oqý oryndaryna qabyldaý naýqany alǵash ret tolyqtaı tsıfrlyq formatta uıymdastyrylyp jatyr. 15 shildeden bastap talapkerler dene daıarlyǵy boıynsha normatıvterdi tapsyrý kezeńine kirisedi, dep habarlaıdy Polisia.kz.
Mınıstrliktiń málimetinshe, qabyldaý naýqany «Qyzmet-Police.kz» aqparattyq júıesi arqyly júzege asyrylýda. Bul talapkerlerdiń qujat tapsyrý protsesin jeńildetip, konkýrstyń ashyqtyǵyn qamtamasyz etýge múmkindik beredi.
15 shildeden bastap talapkerler turǵylyqty jerindegi aýmaqtyq polıtsııa departamentterinde dene daıarlyǵy normatıvterin tapsyrady. Barlyq synaqtar beınejazbaǵa túsirilip, tikeleı efırde kórsetiledi. Sonymen qatar ata-analar synaq barysyn óz kózderimen baqylaı alady.
– Bıylǵy qabyldaý naýqanynyń basty ereksheligi – onyń alǵash ret tolyǵymen tsıfrlyq formatta «Qyzmet-Police.kz» aqparattyq júıesi arqyly ótkizilýi. Bizdiń negizgi mindetimiz – konkýrstyń barynsha ashyq ári ádil ótýin qamtamasyz etý, – dedi ІІM Jeke qurammen jumys jónindegi departamenti basqarmasynyń bastyǵy Senbek Imanǵalı.
Onyń aıtýynsha, qabyldaýdyń alǵashqy kezeńi sátti aıaqtalǵan. Talapkerler qujattaryn onlaın tapsyryp, áskerı-dárigerlik komıssııanyń qorytyndylaryn da júıe arqyly alǵan. Sonyń nátıjesinde qaǵaz qujattarmen jumys pen túrli mekemelerge barý qajettiligi edáýir qysqarǵan.
Normatıvter aıaqtalǵannan keıin talapkerlerdiń materıaldary joǵary oqý oryndarynyń qabyldaý komıssııalaryna joldanady. Komıssııa UBT nátıjelerin, jeńildikterdiń negizdiligin jáne ózge de qujattardy qarap, sheshim qabyldaıdy. Qajet bolǵan jaǵdaıda úmitkerler beınebaılanys arqyly áńgimelesýden ótedi. Bul protsess te tolyq jazylyp otyrady.
– Bıyl ІІM vedomstvolyq joǵary oqý oryndaryna bólingen 1250 orynǵa tórt myńǵa jýyq talapker úmitker bolyp otyr. Sondyqtan ata-analardan oqýǵa túsirýge kómektesemin nemese máseleni sheship beremin dep aqsha suraıtyn alaıaqtarǵa senbeýdi suraımyz. Búginde barlyq sheshimder tsıfrlyq júıede qabyldanyp, árbir kezeń tirkeledi, – dedi Senbek Imanǵalı.
Aıta keteıik, Almatyda da kolledjge túsý tolyq tsıfrlyq formatqa kóshti.
