ІІM joǵary oqý oryndaryna qabyldaý tolyqtaı tsıfrlyq formatqa kóshti
ASTANA. KAZINFORM — 15 shildeden bastap talapkerler turǵylyqty jeri boıynsha aýmaqtyq polıtsııa departamentterinde dene shynyqtyrý daıyndyǵy boıynsha normatıvterdi tapsyrýǵa kirisedi.
ІІM vedomstvolyq joǵary oqý oryndaryna qabyldaý naýqany «Qyzmet-Police.kz» aqparattyq júıesi arqyly jańa tsıfrlyq formatta jalǵasyp jatyr. 15 shildeden bastap talapkerler turǵylyqty jeri boıynsha aýmaqtyq polıtsııa departamentterinde dene shynyqtyrý daıyndyǵy boıynsha normatıvterdi tapsyrýǵa kirisedi. Barlyq synaqtar beınejazbaǵa túsirilip, tikeleı efırde kórsetiledi. Sonymen qatar ata-analar synaq barysyn jeke qatysyp baqylaı alady. Bul konkýrstyq irikteýdiń barynsha ashyq ári ádil ótýin qamtamasyz etýge baǵyttalǵan.
— Qurmetti ata-analar men talapkerler! Іshki ister mınıstrliginiń vedomstvolyq joǵary oqý oryndaryna qabyldaý naýqany qyzý júrip jatyr. Bıylǵy qabyldaý naýqanynyń basty ereksheligi — onyń alǵash ret tolyǵymen tsıfrlyq formatta «Qyzmet-Police.kz» aqparattyq júıesi arqyly ótkizilýi. Bizdiń negizgi mindetimiz — konkýrstyń barynsha ashyq ári barshaǵa túsinikti ótýin qamtamasyz etý.
Birinshi kezeń sátti aıaqtaldy. Kandıdattar qujattaryn júıe arqyly tapsyrdy, áskerı-dárigerlik komıssııanyń nátıjeleri de osy júıede kórsetildi. Sonyń arqasynda qaǵaz túrindegi jeke ister, túrli mekemelerge barý aıtarlyqtaı azaıdy, - dedi ІІM jeke qurammen jumys jónindegi departamentiniń basqarma bastyǵy Senbek Imanǵalı.
15 shildeden bastap kelesi kezeń — dene shynyqtyrý daıarlyǵy boıynsha normatıvterdi tapsyrý bastalady. Normatıvter joǵary oqý oryndarynda emes, kandıdattardyń turǵylyqty jeri boıynsha aýmaqtyq polıtsııa departamentterinde qabyldanady. Bul eń aldymen talapkerler men olardyń ata-analaryna qolaıly bolý úshin jasalyp otyr.
Eń bastysy búkil protsess barynsha ashyq ótedi. Árbir normatıvtiń oryndalýy beınejazbaǵa túsirilip, tikeleı efır uıymdastyrylady. Sondaı-aq ata-analar synaqtar ótkiziletin jerde bolyp, olardyń ótý barysyn óz kózderimen baqylaı alady. Biz ár adamnyń konkýrstyń ádil ári obektıvti ótip jatqanyna kóz jetkizgenin qalaımyz.
Normatıvter aıaqtalǵannan keıin ár kandıdattyń materıaldary tıisti joǵary oqý ornynyń qabyldaý komıssııasyna jiberiledi. Komıssııa UBT nátıjelerin qaraıdy, jeńildikterdiń negizdiligin tekseredi, qujattardy zerdeleıdi jáne konkýrstyq kórsetkishter negizinde ǵana sheshim qabyldaıdy.
Qajet bolǵan jaǵdaıda kandıdat beınebaılanys arqyly áńgimelesýge shaqyrylýy múmkin. Áńgimelesý mindetti túrde jazylady. Bul — ashyqtyq pen obektıvtilikti qamtamasyz etetin taǵy bir qosymsha kepildik, - dedi ol.
Bıyl bólingen 1250 orynǵa tórt myńǵa jýyq talapker úmitker bolyp otyr.
Sóz sońynda ata-analarǵa arnaıy úndeý jasaǵym keledi. Syıaqy úshin oqýǵa túsýge kómektesemin, protsesti jedeldetemin nemese qandaı da bir máseleni sheship beremin degen adamdarǵa senbeńizder. Óz ýaqyttaryńyz ben qarajattaryńyzdy saqtańyzdar!
Búginde barlyq negizgi sheshimder tsıfrlyq júıede qabyldanady, árbir kezeń tirkeledi. Balalaryńyz bul aqparatty jeke kabınetterinen kóre alady, al qabyldaý naýqanyna qatysýshylardyń áreketteri tekseriledi.
Іshki ister mınıstrligi barlyq talapkerlerge sáttilik tileıdi jáne bilimderińiz, tabandylyqtaryńyz oqýǵa sátti túsýge negiz bolady dep senedi! — dedi ІІM jeke qurammen jumys jónindegi departamentiniń basqarma bastyǵy Senbek Imanǵalı.
Aıta ketelik AQSh-tyń Nıý-Iork qalasynyń polıtsııa departamentinde etnıkalyq qazaqtar qyzmet atqaryp júrgeni týraly jazǵan edik.
