ІІM: Zańsyz qosymsha otyn baktaryn paıdalanǵan 255 júrgizýshi jaýapqa tartyldy
ASTANA. KAZINFORM — Іshki ister mınıstrligi janar-jaǵarmaı materıaldaryn zańsyz áketýdiń jolyn kesý maqsatynda qosymsha otyn baktarymen zańsyz jabdyqtalǵan kólikterge baqylaýdy kúsheıtti.
Vedomstvo málimetinshe, memlekettik shekaradaǵy avtomobıl ótkizý beketteriniń mańynda 59 polıtsııa beketi jumys istep tur. Onda polıtsııa qyzmetkerleri ózge memlekettik organdarmen birlesip, shekaradan ótetin kólik quraldaryn tekserip jatyr.
Jyl basynan beri kólik quraldaryn zańsyz qosymsha otyn baktarymen qaıta jabdyqtaýǵa qatysty 255 quqyq buzýshylyq faktisi anyqtalǵan.
Osyǵan baılanysty quqyq buzýshylardyń barlyǵy Qazaqstan Respýblıkasynyń Ákimshilik quqyq buzýshylyq týraly kodeksiniń 590-babynyń 7-bóligi boıynsha ákimshilik jaýapkershilikke tartyldy. Olardyń ishinde 195-i — shetel azamaty, 60-y — Qazaqstan azamaty.
ІІM málimetinshe, zańsyz ornatylǵan qosymsha otyn baktary bólshektelgennen keıin kólik ıelerine keri qaıtarylǵan.
Eske salaıyq, buǵan deıin Qazaqstanda memlekettik shekara arqyly munaı ónimderiniń tasymaldanýyna baqylaý kúsheıgenin jazǵanbyz. Memlekettik kirister komıteti zańsyz áketilgen 16 myń lıtrden astam janar-jaǵarmaı materıalyn anyqtady.
