ІІM jyl basynan beri shamamen úsh tonna esirtkiniń aınalymǵa shyǵýyna tosqaýyl qoıdy
ASTANA. KAZINFORM — Іshki ister mınıstrligi «Zań men Tártip» qaǵıdaty boıynsha jumysty jalǵastyryp otyr. Bul týraly Polisia.kz jazdy.
— Bıyl úsh aıda 34 jasyryn esirtki zerthanasy joıyldy: 10-y sıntetıkalyq esirtki óndirý boıynsha, 24-i — fıtozerthana. Mysaly, Taldyqorǵan qalasynda shetel azamattary birden eki esirtki zerthanasyn uıymdastyrǵan. Jabdyqtar, reagentter jáne daıyn esirtki ónimderi tárkilendi. Kúdiktilerdiń áreketteri DarkNet arqyly júrgizilgen. Jalpy zańsyz aınalymnan shamamen úsh tonna esirtki, onyń ishinde 840 kılogramm sıntetıka tárkilendi. Bul úsh mıllıonnan astam bir rettik dozaǵa teń. Esirtki bıznesine keltirilgen shyǵyn 29 mıllıard teńgeden astam. 11 tonna prekýrsor aınalymǵa jiberilmedi. Shamamen 6 myń qazaqstandyq jáne 108 myń sheteldik kart-shot buǵattalyp, olar boıynsha barlyq tranzaktsııa túrine shekteý qoıyldy. 93 mıllıon teńge kólemindegi qarajat toqtatyldy. Bul baǵyttaǵy jumys jalǵasýda, — dedi ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Buǵan deıin ІІM Almatydaǵy elıtalyq klýbta esirtki satý deregi áshkerelengenin habarlaǵan edi.
