ІІM: Jyl basynan beri 26 tonnadan astam esirtki tárkilendi
ASTANA. KAZINFORM — Bıyl 9 aıda 12 zerthana joıylyp, 26 tonnadan astam túrli esirtki tárkilengen.
— Jyl basynan beri 26 tonnadan astam túrli esirtki zattary tárkilendi, bul ótken jyldyń osy kezeńimen salystyrǵanda 35%-ǵa kóp. Onyń ishinde 3 tonnasy keptirilgen marıhýana, 412 kelisi gashısh, 1,14 tonnasy sıntetıkalyq esirtki, qalǵany — kannabıs ósimdigi, — dedi QR ІІM Esirtkige qarsy is-qımyl komıteti tóraǵasynyń orynbasary Qýandyq Áljanov.
Málimetke saı, kannabıs tobyna jatatyn esirtkiler jabyq jylyjaıda, ıaǵnı fıtolaboratorııalarda jıi ósiriletin bolǵan. Bundaı 93 jylyjaı anyqtaldy, bul ótken jylmen salystyrǵanda 5 ese kóp.
— 9 aı ishinde 6 myńnan astam esirtkige qatysty quqyq buzýshylyq anyqtaldy, onyń ishinde 2,7 myńy — qylmystyq is. Atap aıtqanda 1,7 myńy — satý faktisi, 301-i — asa iri mólsherde saqtaý, 379-y — quramynda esirtki bar ósimdikterdi ósirý, 117-si — kontrabanda. Osy jyldyń basynan bastap esirtki óndirýshilerge qatysty zań kúshine endi. Olarǵa ómir boıyna bas bostandyǵynan aıyrý jazasyn taǵaıyndaý kózdelgen. Polıtsııa 2024 jyly 29 esirtki zerthanasyn joıyp, 419 kg sıntetıkalyq esirtkini tárkiledi. Bıyl 9 aıda 12 zerthana joıylyp, 1 tonnadan astam sıntetıkalyq esirtki alyndy. Bul kórsetkish 3 esege ósken, — dedi ol OKQ alańynda.
Spıkerdiń aıtýynsha, uzaq merzimdi jedel jumystar nátıjesinde 16 uıymdasqan qylmystyq toptyń qyzmeti toqtatyldy, onyń 3-eýi — transulttyq qylmystyq top.
— Jalpy 76 adam ustaldy, onyń 16-sy — top jetekshisi, 60-y — belsendi qatysýshy. 24 tonnaǵa jýyq hımııalyq zat tárkilendi, onyń 17 tonnasy — prekýrsorlar, sonymen qatar reaktıvter men qurylǵylar. Internettegi nasıhat pen qarjy aǵyndary 170 esirtki nasıhaty men jarnama faktisi anyqtaldy, — dedi komıtet basshysynyń orynbasary.
Qýandyq Áljanov, sondaı aq, 26 myńǵa jýyq ınternet-resýrstyń qyzmeti toqtatylǵanyn atap ótti. Onyń ishinde 6 myńnan asa narkosaıt, 35 myńnan astam banktik karta-shottar men 2,5 mlrd teńge buǵattalǵan.
Aıta keteıik, buǵan deıin Túrkistan oblysynda eki polıtseı tárkilengen esirtkini satyp jatqan jerinen ustalǵanyn jazǵan edik.
Kámılá Múlik