ІІM: Jyl basynan beri 190-ǵa jýyq mal urysy ustaldy

ASTANA. KAZINFORM — Sońǵy bes jylda Qazaqstanda mal urlyǵynyń sany 64%-ǵa azaıdy, dep habarlaıdy Polisia.kz.

Almaty oblysynda krımınaldyq polıtsııa qyzmetkerleri jaıylymda júrgen iri qara maldy urlaǵan úsh adamnan quralǵan qylmystyq topty ustady. Búginde atalǵan toptyń jergilikti turǵyndarǵa tıesili 30-dan astam sıyrdy urlaǵany dáleldendi.

Belgili bolǵandaı, ustalǵandardyń biri Volkswagen júk kóliginiń júrgizýshisi bolyp jumys istegen. Kúdiktiler ár eki-úsh kún saıyn mal urlap, ony soıyp, etin Almaty qalasynyń bazarlarynda satqan.

Pavlodar oblysynda da polıtsııa qyzmetkerleri úsh adamnan turatyn qylmystyq topty ustady. Olar 2023 jylǵy jeltoqsannan bastap búgingi kúnge deıin Ekibastuz aýdany aýmaǵynda jylqylardy urlaǵan.

Tergeý barysynda kúdiktilerdiń biri aýyl sharýashylyǵy seriktestiginde jylqyshy bolyp jumys istep, sońǵy eki jyl ishinde 70-ten astam jylqyny urlaǵany anyqtaldy.

Mal urlyǵymen kúres – polıtsııa qyzmetiniń basym baǵyttarynyń biri. Qabyldanǵan sharalardyń nátıjesinde sońǵy bes jylda mal urlyǵy qylmystarynyń sany 64%-ǵa azaıǵan.

Jyl basynan beri 188 mal urlyǵy faktisi boıynsha qylmyskerler ustalyp, 41 qylmystyq toptyń áreketi toqtatyldy. Urlanǵan 1134 mal basy zańdy ıelerine qaıtaryldy.

Іshki ister mınıstrligi qarapaıym qaýipsizdik erejelerin saqtaýdy usynady:

• qoralardy bekitip, maldy qaraýsyz qaldyrmaý kerek;
• asyl tuqymdy maldy baqylaýǵa alý maqsatynda GPS-trekerlerdi ornatý sııaqty zamanaýı tásilderdi keńinen qoldaný qajet;
• maldy únemi esepke alyp otyrý, chıpteý, syrǵalaý jáne en salý kerek.

Aıta keteıik, Túrkistan oblysynda mal urlyǵyn kásip etken 4 qylmystyq top ustaldy.