ІІM: jasóspirimder qylmysynyń aldyn alý kúsheıtiledi

Іshki ister mınıstri Memleket basshysy Joldaýda Qazaqstan damýynyń jańa kezeńine arnalǵan strategııalyq mindetterdi aıqyndap, qoǵam birligin, tártip pen jaýapkershilikti nyǵaıtýdyń mańyzdylyǵyn atap ótkenin jetkizdi. Prezıdent bul mindetterdi iske asyrýda memlekettik apparat pen quqyq qorǵaý organdaryna erekshe ról júktegen.

— Memleket basshysy: «Patrıot bolý degenimiz — Zańdy qurmetteý, Tártipti saqtaý, Otan ıgiligi úshin aıanbaı eńbek etý», — dep naqty atap ótti. Polıtsııa úshin bul eń aldymen azamattardyń qaýipsizdigin qamtamasyz etý, olardyń quqyqtaryn qorǵaý jáne zańdylyqty saqtaý, — dedi Erjan Sadenov.

Mınıstr polıtsııa qyzmetkerleri memlekettik saıasatty jergilikti jerlerde tikeleı júzege asyrýshylar ekenin aıtty. Polıtsııa qyzmetkerleri iri qalalardan bastap eń shalǵaı aýyldarǵa deıin elimizdiń barlyq óńirinde qyzmet atqarady.

Azamattar memlekettik sheshimderdiń is júzinde qalaı júzege asyrylyp jatqanyn, ádildik pen zańdylyqtyń qalaı qamtamasyz etiletinin, adam quqyqtarynyń qalaı qorǵalatynyn polıtseılerdiń kúndelikti qyzmeti arqyly kóredi. Sondyqtan árbir qyzmetker qoǵamdyq tártipti qamtamasyz etýmen ǵana shektelmeı, jeke úlgisi arqyly zańǵa qurmetpen qaraýdy qalyptastyryp, adaldyqty, tártipti jáne qoǵam aldyndaǵy jaýapkershilikti kórsetýge tıis.

«Zań men Tártip» qaǵıdaty quqyq qorǵaý organdary qyzmetiniń ustanymy ǵana emes, árbir azamattyń kúndelikti ómirinen kórinis tabýy tıis qoǵamdyq mádenıettiń negizi ekeni atap ótildi.

Zańǵa baǵyný mádenıetin erte jastan qalyptastyrýǵa erekshe nazar aýdaryldy. Vedomstvo basshysy zańdy qurmetteý, tártipti saqtaý jáne óz is-áreketine jaýapkershilikpen qaraý qasıetteri bala kezden qalyptasýy qajettigin atap ótti. Bul baǵyttaǵy jumys otbasynyń, mekteptiń, memlekettik organdar men qoǵamnyń birlesken kúsh-jigerin talap etedi. Osyǵan baılanysty jergilikti atqarýshy organdarmen jáne bilim berý uıymdarymen birlesip, oqýshylar arasynda profılaktıkalyq jáne tárbıe jumystaryn kúsheıtý, «Jas saqshy» synyptarynyń jelisin keńeıtý, mektep tálimgerleri ınstıtýtyn damytý tapsyryldy.

Ýákiletti organdarmen jáne qoǵamdyq uıymdarmen birlesip, oqýshylardyń bos ýaqytyn tıimdi uıymdastyrý, olardy patrıottyq, sporttyq jáne qoǵamdyq paıdaly bastamalarǵa belsendi túrde tartý qajettigi atap ótildi. Sonymen qatar jasóspirimder arasyndaǵy qylmystyń aldyn alý, býllıngti, zorlyq-zombylyqty jáne oqýshylarǵa qatysty ózge de quqyqqa qaıshy áreketterdi der kezinde anyqtaý ári jolyn kesý mindetteri qoıyldy.

Polıtsııanyń mindeti — mektep pen otbasynyń ornyn almastyrý emes, olarmen birlese otyryp, jas urpaqtyń boıynda zańǵa qurmet pen quqyq buzýshylyqtarǵa tózbeýshilik kózqarasyn qalyptastyrý ekeni basa aıtyldy.

Polıtsııanyń qoǵammen ózara is-qımylyna da erekshe mán berildi. Mınıstr azamattardyń quqyq buzýshylyqtarǵa tózbeýshilik tanytyp, zań buzýshylyqtar týraly habarlap, polıtsııaǵa kómektesýge daıyn ekenin jıi bildire bastaǵanyn atap ótti. Mundaı azamattyq ustanymdy qoldap, odan ári damytý qajet.

Aýmaqtyq bólinisterdiń basshylaryna polıtsııanyń qoǵamdyq kómekshileri ınstıtýtyn keńeıtý, quqyq buzýshylyqtardyń aldyn alý jumystaryna volonterlerdi, jastar jáne qoǵamdyq birlestikterdi belsendi túrde tartý tapsyryldy. Bul rette halyqpen ózara baılanys turaqty sıpatta bolýy tıis. Polıtsııa azamattardyń ótinishterine jaýap berip qana qoımaı, olardyń pikirine qulaq asyp, bastamalaryn qoldaýy jáne qaýipsizdik máselelerin birlesip sheshýi qajet.

Qoǵamdyq tártipti bir ǵana polıtsııanyń kúshimen qamtamasyz etý múmkin emes. Ol ár adamnyń jeke jaýapkershiliginen jáne azamattardyń ózara qurmetinen bastalady. Osy turǵyda «Taza Qazaqstan» tujyrymdamasyn iske asyrý máselesi qaraldy. Mınıstr vandalızmge, usaq buzaqylyqqa, zańsyz jazýlar salýǵa jáne qoǵamdyq múlikti búldirýge qarsy kúresti kúsheıtýdi talap etti. Eldi mekenderdiń tazalyǵy men abattandyrylýy kommýnaldyq sharýashylyqtyń ǵana máselesi emes, sonymen qatar qoǵamdyq mádenıettiń, aınaladaǵy adamdarǵa jáne ózgeniń eńbeginiń nátıjesine qurmetpen qaraýdyń kórsetkishi ekeni atap ótildi. Quqyq buzýshylyqtardyń jolyn kesýmen qatar, qoǵam ókilderimen birlesip, qoǵamdyq keńistikter men qorshaǵan ortaǵa uqypty qaraý mádenıetin qalyptastyrý qajettigine basa nazar aýdaryldy.

El ınfraqurylymyn aýqymdy jańǵyrtýǵa baılanysty birqatar mindetter qoıyldy. Memleket basshysy aıqyndaǵan jalpyhalyqtyq qurylys baǵdarlamasy aıasynda mınıstr kósheler men qoǵamdyq oryndarda quqyq buzýshylyqtardyń aldyn alý jumystaryn kúsheıtýdi, kóshi-qon baqylaýyn nyǵaıtýdy, jańa eldi mekender men turǵyn aýdandardyń damýyn eskere otyryp, polıtsııa qyzmetin uıymdastyrýdy tapsyrdy.

Jol qozǵalysy men kólik tasymalynyń qaýipsizdigine erekshe nazar aýdaryldy. Halyqaralyq kólik dálizderiniń damýyna baılanysty avtokólik joldarynyń jaı-kúıine baqylaýdy kúsheıtý, jol ınfraqurylymyndaǵy kemshilikterdiń ýaqtyly joıylýyn qamtamasyz etý mindeti qoıyldy. Sondaı-aq jol-kólik oqıǵalarynyń aldyn alýǵa baǵyttalǵan zamanaýı tehnıkalyq quraldardy odan ári engizý tapsyryldy.

Jańa áýejaılardyń ashylýy men temirjol jelileriniń salynýyn eskere otyryp, kóliktegi polıtsııa bólinisteriniń jumysyna qajetti jaǵdaılardy aldyn ala qarastyrý mindetteldi.

Prezıdent Joldaýyn iske asyrýda tsıfrlandyrý men jasandy ıntellektini qoldanýǵa mańyzdy oryn berildi. Mınıstr zamanaýı tehnologııalar polıtsııanyń jumysyn jeńildetip qana qoımaı, onyń nátıjesin arttyrýǵa, qylmystardyń aldyn alýǵa, qaterlerge jedel den qoıýǵa jáne azamattardy tıimdirek qorǵaýǵa múmkindik berýi tıis ekenin atap ótti.

Búginde beınebaqylaý júıeleri men basqa da tsıfrlyq sheshimderdiń kómegimen kóptegen qylmys ashylyp, jyl saıyn júz myńdaǵan ákimshilik quqyq buzýshylyqtyń joly kesiledi. Bólinis basshylaryna zamanaýı tehnologııalardy qoldaný aıasyn keńeıtý, jedel basqarý ortalyqtarynyń jumysyn jetildirý jáne qyzmetkerlerdi smart-beınetirkegishtermen jabdyqtaý tapsyryldy.

Sonymen qatar mınıstr tsıfrlandyrýǵa formaldy túrde qaraýǵa jol bermeýdi talap etti. Tehnologııalardyń tıimdiligin baǵalaýdyń basty ólshemi — ornatylǵan qurylǵylardyń sany emes, adamdardyń naqty qaýipsizdigi.

Tsıfrlyq ekonomıkanyń qarqyndy damýy jaǵdaıynda ınternet-alaıaqtyq pen kıberqylmysqa qarsy is-qımyl máselelerine de aıryqsha nazar aýdaryldy. Mundaı qylmystardy anyqtaý men ashý ádisterin jetildirýmen qatar, halyqty alaıaqtyqtyń jańa tásilderi týraly habardar etý, azamattardyń tsıfrlyq saýattylyǵyn arttyrý tapsyryldy.

Kásipkerlerdiń zańdy múddelerin qorǵaý máseleleri de jeke qaraldy. Ekonomıkany damytý, jańa óndiris oryndaryn ashý jáne ınvestıtsııalar tartý zań ústemdigin talap etetini atap ótildi. Polıtsııa menshik quqyǵyn qorǵaýdy qamtamasyz etip, quqyqqa qaıshy áreketterge ýaqtyly den qoıýǵa jáne kásipkerlik qyzmetke negizsiz aralasýǵa jol bermeýge tıis.

Sonymen qatar ishki ister organdary qyzmetkerleriniń ózderine de erekshe talaptar qoıyldy. «Zań men Tártip» qaǵıdatyn tek zań talaptaryn múltiksiz saqtaıtyn adam ǵana júzege asyra alatyny atap ótildi. Adaldyq, ádildik, azamattarǵa qurmetpen qaraý jáne jeke tártip árbir polıtseıdiń negizgi qasıetterine aınalýy tıis.

Keńesti qorytyndylaı kele, Erjan Sadenov barlyq deńgeıdegi basshylardan Prezıdent qoıǵan mindetterdiń sapaly oryndalýyn qamtamasyz etýdi talap etti. Basty baǵdar — azamattardyń qaýipsizdigin qamtamasyz etý, halyqtyń senimin arttyrý jáne qoǵamda zańdy qurmetteý mádenıetin qalyptastyrý. Qoıylǵan mindetterdiń oryndalýyna bólinisterdiń birinshi basshylary jaýapty bolady.

Aıta ketelik Qazaqstan polıtsııasy robot-ıt pen smart-beıdj múmkindikterin kórsetken edi.