ІІM jańa oqý jyly qarsańynda ata-analar men ustazdarǵa úndeý jasady
ASTANA. KAZINFORM — Jańa oqý jyly qarsańynda Іshki ister mınıstrligi ata-analarǵa, oqýshylar men ustazdarǵa balalardyń qaýipsizdigine erekshe mán berýge shaqyrdy.
Oqý jyly bastalǵannan keıin balalardyń úıden tys jerde ótkizetin ýaqyty kóbeıedi. Olar mektepke ózderi baryp-qaıtyp, túrli úıirme men sporttyq sektsııasyna qatysady. Osyǵan baılanysty ІІM joldaǵy qaýipsizdik erejelerin qatań saqtaýdyń mańyzyn eske saldy.
Mınıstrliktiń málimetinshe, jańa oqý jylyna daıyndyq barysynda mektepterdiń mańyndaǵy jol qaýipsizdigin qamtamasyz etý boıynsha qajetti jumystar júrgizilgen. Balalardy tasymaldaıtyn avtobýstar da tolyq tekserýden ótken. Anyqtalǵan kemshilikter boıynsha tıisti nusqamalar berilip, olar oqý jyly bastalǵanǵa deıin joıylýy tıis.
ІІM ata-analarǵa balalarǵa myna qaýipsizdik talaptaryn túsindirýdi usyndy:
- joldy tek belgilengen jerden kesip ótý;
- joldan óter kezde telefon paıdalanbaý;
- qulaqqapty sheship, aınalaǵa muqııat qaraý;
- velosıped, moped jáne elektrosamokat mingende Jolda júrý qaǵıdalaryn saqtaý;
- balanyń qaıda júrgenin jáne kimmen aralasatynyn bilip otyrý;
- balalarmen qaýipsizdik máseleleri týraly jıi sóılesý.
Polıtsııa balanyń qıyn jaǵdaıǵa tap bolǵan kezde ata-anasynan kómek suraı alatynyna senimdi bolýy mańyzdy ekenin atap ótti.
Eger balaǵa qaýip tónip tursa, 102 nómirine nemese 111 baılanys ortalyǵyna habarlasýǵa bolady.
