M. Jákishevke qatysty shyǵarylǵan úkim qatań emes - aýdandyq sot tóraǵasy
ASTANA. Naýryzdyń 26-sy. QazAqparat /Rýslan Ǵabbasov/ - Saryarqa aýdanynyń №2 aýdandyq sotynyń tóraǵasy Nurjan Joldasbekovtyń pikirinshe, Muhtar Jákishevke qatysty shyǵarylǵan úkim qatań emes.
. Bul týraly ol búgin Astanada «Qazatomónerkásip» kompanııasynyń burynǵy basshysynyń isine qatysty ótken baspasóz máslıhatynda aıtty, dep habarlaıdy QazAqparat.
«Qylmystyq protsessýaldyq zańnamanyń jalpy erejesi boıynsha úkim shyǵarý kezinde is boıynsha tóraǵalyq etýshi aıyptalýshynyń tulǵalyǵyn ǵana eskerip qoımaıdy. Árıne, ol (M. Jákishev) «Qazatomónerkásip» kompanııasynyń damýyna kóp úles qosqan adam, sondaı-aq óz isindegi epti menedjerlerdiń biri. Alaıda zań barlyqtary úshin birdeı»,- dedi N. Joldasbekov.
«Bizdiń tájirıbemizde 2-3 myń teńge para úshin jol polıtsııasy qyzmetkerin 3-5 jylǵa jaýapqa tartamyz. Al eleýli kólemde jumsalǵan qarjyǵa, sondaı-aq iri kólemde alynǵan para úshin nege 14 jylǵa bas bostandyǵynan aıyrmasqa», - dedi ol.
Aıta keteıik, naýryzdyń 12-inde M. Jákishevke qatysty 14 jyl bas bostandyǵanan aıyrý úkimi shyǵarylǵan bolatyn.
Baspasóz máslıhatynda málim bolǵanyndaı, M. Jákishev «Qazatomónerkásip» kompanııasynyń prezıdenti bolǵan ýaqytta, memlekettik qyzmetterdi oryndaýǵa ýákilettilik berilgen tulǵa bola otyryp, óziniń qyzmettik jaǵdaıyn paıdalanyp, uıymdasqan qylmystyq toppen birge oǵan senip tapsyrylǵan «Qazatomónerkásip» UAK» aktsıonerlik qoǵamynyń múlkin 111 mıllıon teńgeden astam mólsherinde iri kólemde jymqyrǵan, sondaı-aq deldaldar arqyly toptasyp birneshe ret asa iri mólsherde jalpy somasy 791 mıllıon teńgeden astam kólemde aqsha túrinde para alǵan.
