M. Jákishev 111 mln. teńgeden astam qarjyny qymqyryp, 791 mln. teńgeden astam para alǵan - N. Joldasbekov
ASTANA. Naýryzdyń 26-sy. QazAqparat /Ernur Aqanbaı/ - Muhtar Jákishev «Qazatomónerkásip» kompanııasynyń prezıdenti bolǵan ýaqytta, memlekettik qyzmetter oryndaýǵa ýákilettilik berilgen tulǵa bola otyryp, óziniń qyzmettik jaǵdaıyn paıdalanyp, uıymdasqan qylmystyq toppen birge oǵan senip tapsyrylǵan «Qazatomónerkásip» UAK» aktsıonerlik qoǵamynyń múlkin 111 mıllıon teńgeden astam mólsherinde iri kólemde urlaǵan.
Bul týraly búgin Astanadaǵy baspasóz máslıhatynda Saryarqa aýdanynyń №2 aýdandyq sotynyń tóraǵasy Nurjan Joldasbekov málim etti, dep habarlaıdy QazAqparat.
Onyń aıtýynsha, M. Jákishev, sondaı-aq deldaldar arqyly toptasyp birneshe ret asa iri mólsherde jalpy somasy 791 mıllıon teńgeden astam kólemde aqsha túrinde para alǵan. «Eger aıyptaýshy tarapynan usynylǵan osy aıyptardyń barlyǵyn qysqasha baıandaıtyn bolsaq, olardyń barlyǵy sot otyrystarynda tolyqtaı rastaldy jáne úkimniń negizin qalady», dedi N. Joldasbekov.
Onyń atap kórsetýinshe, sot M. Jákishev «Qazatomónerkásip» kompanııasynyń basshysy qyzmetine taǵaıyndalǵan 1999 jyldan bastap 2009 jyldyń mamyr aıyn qosa alǵandaǵy kezeńde uıymdasqan qylmystyq toptyń quramynda qurylys, merdiger jumystaryn, materıaldar men qyzmetterdi jetkizýdi júzege asyratyn fırmalardyń, kompanııalardyń zańdy tulǵalar ókilderinen qorqytý arqyly asa iri mólsherde para retinde aqsha qarajatyn alǵanyn anyqtaǵan. Jákishevtiń deldaldar arqyly para berýshilerden alǵan aqsha qarajatynyń mólsheri jasalǵan sharttar somasynyń 2-den 10-paıyzy aralyǵyn quraǵan. «Jákishevtiń asa iri mólsherde para alǵan mundaı 29 epızodtar sot otyrystarynda rastaldy. Onyń jalpy somasy 791 mıllıon teńgeden astam», dedi ol.
Onyń sózine qaraǵanda, mysaly Qaraǵandy oblysyndaǵy kenishterge kúkirt qyshqylyn jetkizýge jasalǵan kelisimshart boıynsha Jákishev deldaldar arqyly 400 myń AQSh dollary kóleminde para alǵan. Taǵy bir mysal, ol 2009 jyldyń aqpan jáne sáýir aılarynda kenishterge nysandar salý kezinde Ońtústik Qazaqstan oblysynyń merdiger uıymdarynyń ókilderinen para retinde 10 mıllıon 500 myń teńge alǵan. Sonymen qatar, Jákishev 2005-2006 jyldary Qyzylorda oblysynda kenishter salý kezinde merdiger jumystaryn júrgizýge birlesken kásiporynnyń basshylarynan para retinde jalpy somasy 640 myń AQSh dollaryn birneshe kezeńmen alǵan.
«Qazatomónerkásip» kompanııasynyń burynǵy basshysy Muhtar Jákishevtiń alǵan osy somalarynyń barlyǵy «qara kassaǵa» shoǵyrlandyrylǵan. Bul úshin seıfter satyp alynǵan. Bastapqyda bul aqshalar «Qazatomónerkásip» kompanııasy keńsesiniń astynda saqtalǵan. Keıinnen olardy saqtaý úshin ádeıi páterler jalǵa alynǵan. Jedel izdestirý sharalarynyń barysynda atalmysh aqshalar kórsetilgen páterden tárkilenip alyndy», dedi ol.
Aldyn ala tergeý barysynda tárkilengen Jákishevtiń para retinde alǵan aqshalary, sondaı-aq «Qazatamónerkásip» AQ vıtse-prezıdentterine, departament dırektorlaryna, qurylymdyq bólimsheler men enshiles kásiporyndar basshylaryn zańsyz jolmen tólengen, keıin óz erikterimen qaıtarǵan aqshalardyń barlyǵy, atap aıtqanda 19 mln. 159 myń 900 teńge, 2 mln. 739 myń 948 AQSh dollary, 144 myń 700 eýro, 1 mln. reseı rýbli jáne 450 aǵylshyn fýnt sterlıngi memleket kirisine qaıtarylǵan.
Onyń sózine qaraǵanda, «Qazatomónerkásip» kompanııasynyń burynǵy basshysy Muhtar Jákishev pen onyń oqqaǵary Talǵat Qystaýbaevqa qatysty qozǵalǵan qylmystyq isti sot berilgen dálelderdi zertteý jumystaryn aıyptaýshy jáne qorǵaýshy taraptardyń tikeleı qatysýymen aıtysý jáne teń quqyqtylyq qaǵıdaty negizinde júrgizdi.
Aıta keteıik, Saryarqa aýdanynyń №2 aýdandyq soty M. Jákishevtiń is-áreketterin QR Qylmystyq Kodeksiniń 176-shy babynyń 3-shi tarmaǵynyń «a», «b» tarmaqshalary, 307-shi babynyń 2-shi tarmaǵy boıynsha saralap, múlkin tárkilep jáne jazasyn túzeý kolonııasynda qatań rejimde óteý arqyly 14 jyl merzimge bas bostandyǵynan aıyrý túrindegi jaza taǵaıyndady. Al, T. Qystaýbaevtyń is-áreketterin QR Qylmystyq kodeksiniń 176-shy babynyń 3-shi tarmaǵynyń «a» jáne «b» tarmaqshalary, 307-shi babynyń 2-shi tarmaǵy boıynsha saralap, múlkin tárkilep jáne jazasyn túzeý kolonııasynda jalpy rejimde óteý arqyly 5 jyl merzimge bas bostandyǵynan aıyrý týraly jaza taǵaıyndady. Sot úkimi zańdy kúshine engen joq jáne qylmystyq is júrgizý zańnamasyna sáıkes, taraptarǵa úkimge zańda belgilengen merzimde appellıatsııalyq shaǵymdanýǵa jáne narazylyq bildirýge quqyq berildi.
