ІІM: Zańsyz aınalymnan 55 keliden astam «sıntetıka» tárkilendi

ASTANA. KAZINFORM — Tek sońǵy 10 kún ishinde polıtsııa qyzmetkerleri ártúrli esirtki qylmysymen aınalysqan 14 adamdy ustady, dep habarlaıdy Polisia.kz.

«Zań men tártip» qaǵıdasyn júzege asyrý aıasynda ishki ister mınıstrligi esirtki qylmystarymen kúres boıynsha maqsatty jumysty jalǵastyryp, jastardy zańsyz aınalymǵa tartýǵa jol bermeýge erekshe nazar aýdarady.

Esirtkini jasyryn qoıyp ketýshi men býyp túıýshiden bastap, iri sıntetıkalyq esirtki óndirýshilerge deıingi tolyq taratý arnalary anyqtalyp, jabyldy. Shymkent qalasyndaǵy meshitterdiń biriniń janynda 38 jastaǵy er adam ustaldy. Ol ınternet-dúkende kýrer-býyp túıýshi retinde jumys istegen. Ol sıntetıkalyq esirtkilerdi elimizdiń ártúrli óńirlerinen, sonyń ishinde Almaty oblysynan alyp, jasyrý arqyly satqan. Ustalǵan kezde er adamnan 2 kelige jýyq alfa-PVP tárkilendi.

Shyǵys Qazaqstan oblysynda jas jigitten satýǵa arnalǵan 1 keliden astam mefedron men alfa-PVP tárkilendi.

Qaraǵandy qalasynda jalǵa alynǵan jeke úıde jasyryn esirtki zerthanasynyn joly kesildi. Jergilikti eki turǵyn ustaldy, olardan kóterme baǵamen ótkizýge daıyndalǵan 52 keliden astam alfa-PVP tárkilenip, sonymen qatar esirtki óndirýge arnalǵan 1 tonna prekýrsorlar alyndy. Barlyq kúdikti ustalyp, ýaqytsha ustaý ızolıatoryna qamaldy.

— Jalpy, sońǵy on kúnde zańsyz aınalymnan 55 keliden astam sıntetıkalyq esirtki tárkilendi. Osylaısha, zańsyz aınalymǵa 165 myńnan astam bir rettik dozanyń taralýyna jol berilmedi. ІІM-niń Esirtki qylmystaryna qarsy kúres komıteti qyzmetkerleri esirtki qylmystarymen kúrestiń qatań ári ymyrasyz júrgiziletinin atap ótti. Negizgi maqsat — ulttyń genofondyn qorǵaý, jastardyń densaýlyǵyn saqtaý jáne eldegi esirtki jaǵdaıyn jaqsartý, — delingen mınıstrlik taratqan aqparatta.