ІІM zań men tártip týrasynda: qylmys sany azaıdy
ASTANA. KAZINFORM – Bıyl qoǵamdyq oryndarda jasalǵan qylmystyq quqyq buzý derekteriniń sany 9 paıyzǵa azaıdy. Bul týraly Kazinform agenttiginiń BIZDIÑ ORTA podkastynda QR ІІM Aqparattyq saıasat departamentiniń basqarma basshysy Shuǵyla Turlybek málim etti.
– Osyǵan deıin birneshe jyl buryn beınebaqylaý kameralary kóbeıip jatqan kezde, túrli pikir aıtylyp jatty. Osynyń ózi qoǵamdyq tártiptiń artýyna yqpalyn tıgizdi. Ózimizdiń salaǵa qatysty toqtalsam, bıyl qoǵamdyq oryndarda jasalǵan qylmystyq quqyq buzý derekteriniń sany 9 paıyzǵa azaıdy. Jyl saıyn qylmys sanynyń azaıýy aıtarlyqtaı baıqalyp otyr. Osynyń bári halyq arasynda quqyqtyq mádenıettiń artqanyn, sondaı-aq adamdardyń jaýapkershilikti sezine bastaǵanyn kórsetedi, - dedi Sh. Turlybek.
Onyń aıtýynsha, buryn zań buzyp ádettengen adamdarǵa zań men tártip qaǵıdaty oń yqpal etip otyr.
Óz kezeginde Parlament Májilisiniń depýtaty Natalıa Dementeva qazir qoǵamda zań men tártip qaǵıdatyn keńinen túsindirýge mán berý kerek ekenin atap ótti.
– Jastarmen uzaq ýaqyt jumys istedim. Balalarǵa balabaqshada, mektepten bastap tıisti kýrstardy engizý qajet. Ókinishke qaraı, keıbir jaǵdaıda ata-analar balalaryn tym qatty erkeletip jatady. Sondyqtan balalyq shaqtan qalyptasatyn mentalıtetke nazar aýdarý mańyzdy. Memleketimizde zań birinshi orynda tur. Zańdy bilmeý – bizdi jaýapkershilikten bosatpaıdy, - dedi depýtat.
Aıta keteıik, Memleket basshysy Qasym-Jomart Toqaev elimizde zań men tártip myzǵymas qaǵıdatqa aınalýǵa tıis ekenin tapsyrdy.
Eske salsaq, Іshki ister mınıstrligi «Zań men tártip» jańa tsıfrlyq servısti iske qosty.