Mıanmanyń áskerı soty sottaǵan Aýn San Sý Chjıge raqymshylyq jasaldy
ASTANA. QazAqparat – Mıanmanyń áskerı soty sottaǵan Nobel syılyǵynyń laýreaty Aýn San Sý Chjıge raqymshylyq jasaldy, dep habarlaıdy QazAqparat Euronews-ke silteme jasap.
Mıanma hýntasy eldiń burynǵy demokratııalyq kóshbasshysy Aýn San Sý Chjıge jartylaı raqymshylyq jasalǵanyn jarııalady. Málimdemede aıtylǵandaı, bul – 7 myń jazasyn óteýshini qamtyǵan raqymyshylyqtyń tek bir bóligi. Aýn San Sý Chjı ózine taǵylǵan 19 aıyptyń 5-eýinen bosatyldy. Alaıda, onyń bostandyqqa qashan shyǵatyny naqtylanbaǵan.
Mıanmanyń burynǵy memlekettik keńesshisi 2021 jyldyń basyndaǵy tóńkeristen keıin tutqyndalyp, áskerı sot ony birneshe qylmystyq is boıynsha sottady. Oǵan saılaý zańnamasyn buzý jáne jemqorlyq aıyby da taǵyldy. Jalpy alǵanda 77 jastaǵy Aýn San Sý Chjı otyz jyldan astam ýaqytqa bas bostandyǵynan aıyryldy.
Ol taǵylǵan aıyptardy múldem moıyndamady jáne qısynǵa kelmeıtinin aıtty. Al jaqtastary «saıasatkerdi oqshaýlaý úshin hýnta isti burmalady» dep sanaıdy.
Aýn San Sý Chjıge raqymshylyq jasalǵany týraly aqparat Mıanmadaǵy tótenshe jaǵdaı rejımi taǵy alty aıǵa uzartylǵannan keıingi kúni jarııalady. Bul saılaý ótkizý jáne eldegi azamattyq memlekettik basqarýdy qalpyna keltirý múmkindigine kóleńke túsiredi.
