Mıanmada quldyqtan qashyp shyqqan Qazaqstan azamattary elge jetkiziledi
«Keıingi kezderi Mıanma men Taılandtyń arasynda ornalasqan «Altyn úshburysh» degen aýmaqta Qazaqstan azamattary jumys quldyǵyna túsip jatyr. Osyǵan deıin eskertý aıtyp, aqparat taratsaq ta, azamattarymyz sol jerge baryp jatyr. Keıingi aqparat boıynsha sol jerde bes adam anyqtaldy», - dedi A. Smadııarov elordada ótken baspasóz máslıhatynda.
Onyń aıtýynsha, bıyl sáýir aıynyń orta kezinde bir adam Qazaqstannyń Taılandtaǵy konsýlyna habarlasyp, bes adam Mıanmada quldyqta otyrǵany týraly aıtqan. Olar atalǵan kompanııanyń jumysyna óz erkimen barǵan.
«Osyndaı jaǵdaıda birneshe adamdy qutqarǵan konsýldyń tıisti tájirıbesi bar. Osy oraıda ol atalǵan adamdarǵa quldyqtan bosap shyǵý tásilderine qatysty keńes bergen. Bizdiń azamattardy ustap otyrǵan kompanııa eki el shekarasynyń mańynda ornalasqan. Qazaq jigitteri sol jerdegi ózennen ótip, Taılandtyń aýmaǵyna qashatyn bolyp kelisken. Biraq, qashatyn kúni jarty saǵat buryn ǵana konsýldy eskertken. Al, konsýl Bangkoktan atalǵan shekaraǵa jetý úshin avtokólikpen 7 saǵattaı júrýi kerek. Qazaqstan azamattary kompanııanyń aýmaǵynan shyqqan boıda, olardyń sońynan kompanııa ókilderi qýǵynǵa túsken. Beseýiniń tórteýi ózennen ótip úlgergen, al bireýin kompanııa kúzetshileri ustap alǵan», - dedi resmı ókil.
Onyń sózine qaraǵanda, Taılandtyń aýmaǵyna jetken tórt adamǵa Qazaqstan konsýly kómektesip, olar Bangkokke jetti. 3-4 kúnde Qazaqstan azamattary elge oralady.
«Mıanmada qalǵan adammen bir aptadan beri baılanys joq. Sol kompanııanyń basshylyǵyna jáne kúzetshilerine habarlasqan edik. Olar bizge naqty jaýaptaryn bermedi. Qolda bar aqparatqa sáıkes, olar ár adamǵa 6 mln teńge suraǵan eken. Qazir kelissózderdi jalǵastyryp jatyrmyz. Kompanııa ókilderi jaýap berse, ol jigitti alyp shyǵýǵa múmkindik bar», - dedi A. Smadııarov.
Budan buryn habarlanǵandaı, jyl basynda Mıanmada quldyqta bolǵan Qazaqstanyń eki azamaty elge jetkizildi.
