ІІM WhatsApp qoldanýshylaryn alaıaqtyqtyń jańa túrinen saq bolýǵa shaqyrdy
ASTANA. KAZINFORM – Іshki ister mınıstrligi azamattarǵa WhatsApp messendjerindegi akkaýnttardy qorǵaýǵa qatysty qaýipsizdik sharalaryn saqtaý jóninde eskertý jasady.
Vedomstvo sońǵy ýaqytta messendjer arqyly jasalatyn alaıaqtyq derekteriniń kóbeıgenin atap ótken.
ІІM mamandarynyń aıtýynsha, jeke derekterdiń qoldy bolýyna jol bermeý úshin kelesi qaýipsizdik talaptaryn oryndaý qajet:
- Eki faktorly aýtentıfıkatsııany qosyp alyńyz. Baptaýlarda akkaýntqa kirý kezinde suralatyn qosymsha PIN-kod ornatý usynylady. Bul bógde adamdardyń akkaýntqa ruqsatsyz kirýin qıyndatady.
- Kúdikti habarlamalar men siltemelerge saq bolyńyz. Belgisiz adamdardan kelgen siltemelerge ótpeý, rastaý kodtaryn nemese qupııa aqparatty eshkimge bermeý qajet.
- SIM-kartaǵa PIN-kod ornatyńyz. SIM-kartany qorǵaý nómirdiń zańsyz kóshirilýiniń (SIM swap) aldyn alady.
- Jeke aqparatqa qoljetimdilikti shekteńiz. Baptaýlar arqyly profıl sýreti, statýs jáne sońǵy ret onlaın bolǵan ýaqytty kim kóre alatynyn retteý usynylady.
- Belsendi seanstardy baqylap otyryńyz. Akkaýntqa qosylǵan qurylǵylardy únemi tekserip, beıtanys seanstardy dereý óshirý qajet.
ІІM azamattardy erekshe qyraǵylyq tanytýǵa shaqyrady. Vedomstvonyń málimetinshe, alaıaqtar jıi tanys adamnyń atynan habarlasyp, aqsha suraý ádisin qoldanady. Mundaı jaǵdaıda aqparatty tikeleı telefon arqyly naqtylap alǵan jón.
Mınıstrlik bul talaptardy oryndaý azamattardyń qarjysyn jáne jeke derekterin qorǵaýǵa múmkindik beretinin atap ótti.
Aıta keteıik, Almatyda ınternet-alaıaqtyqqa paıdalanylǵan arnaıy jabdyq tárkilendi.