M.Volnova Astanadaǵy Jastar densaýlyǵy ortalyǵynda kezdesý ótkizdi
ASTANA. 4 qazan. QazAqparat - Búgin Astanadaǵy №7 emhanada London Olımpıadasynyń júldegeri, boksshy Marına Volnovamen kezdesý ótti. Іs-sharanyń negizgi maqsaty - qala boıynsha ashylǵan Jastar densaýlyǵy ortalyqtarynyń jumysyn nasıhattaý.
Bul kezdesýge mektep oqýshylary men emhana qyzmetkerleri kóptep jınaldy. Jastar M.Volnovaǵa sportshynyń ómiri men densaýlyq saqtaýǵa qatysty san alýan saýaldar qoıyp, tuşymdy jaýap aldy. «Ýaqytty bos ótkizýge bolmaıdy. Jastarǵa sportpen kóptep shuǵyldanýǵa keńes beremin. Meıli, ol boks nemese basqa bir sport túri bolsyn. Talaptaný kerek. Sonda ǵana adamnyń ómirlik joly aıqyndalady. Al, eń bastysy, onyń kózdegen maqsattarǵa jetýge múmkindik beretin densaýlyǵy zor bolady», - deıdi M.Volnova.
Aıta keteıik, búginde elordada toǵyz ortalyq jumys isteıdi. Oǵan kelgen jasósipimder men jastar kez kelgen medıtsınalyq kómekke júginip, qupııa túrde keńes ala alady. Munda psıholog, gınekolog, dermatovenerolog jáne áleýmettik qyzmetkerler bar. Aldaǵy ýaqytta Astanada osy ispetti onynshy ortalyqty ashý josparlanyp otyr.
