ІІM urlanǵan telefondardy satyp alǵany úshin jaýapkershilik bar ekenin eskertti
ASTANA. KAZINFORM - Qazaqstanda uıaly telefon urlyǵy men qalta urlyǵynyń sany azaıyp keledi. ІІM málimetinshe, jyl basynan beri uıaly telefon urlyǵy 40%-ǵa tómendegen, - dep habarlaıdy Polisia.kz.
Polıtseıler osyndaı 900-den astam qylmysty ashty. Urlanǵan telefondar ıelerine qaıtaryldy. 700-den astam adam jaýapqa tartyldy. Sondaı-aq uıaly telefon urlyǵymen aınalysqan 12 qylmystyq toptyń joly kesildi. Urlanǵan tehnıkany ótkizetin oryndarǵa erekshe nazar aýdarylyp otyr. Mysaly, Almatyda buryn sottalǵan er adam ustaldy. Odan 30-dan astam urlanǵan telefon tárkilendi.
- ІІM eske salady: urlanǵan múlikti satyp alý jáne qaıta satý qylmystyq jaýapkershilikke ákeledi. Polıtseıler azamattardy qoǵamdyq oryndar men kólikte jeke zattaryna muqııat bolyp, saq júrýge shaqyrady. Zań men tártip ár adamnyń jeke jaýapkershiliginen bastalady, - delingen habarlamada.
Osyǵan deıin QR Іshki ister mınıstrligi sim-karta men akkaýntty berý qylmysqa járdemdesý retinde qaralatyny týraly jazdy.
