ІІM tsıfrlyq tehnologııalar arqyly jol qozǵalysyna baqylaýdy kúsheıtedi
ASTANA. KAZINFORM — Qazaqstanda jol qaýipsizdigin baqylaý úshin drondar, mobıldi keshender, ortasha jyldamdyqty ólsheıtin jáne lazerlik júıeler keńinen qoldanylyp jatyr. Olar jol erejesin buzǵan júrgizýshilerdi anyqtap, qaýipti jaǵdaılarǵa jedel den qoıýǵa jáne jol-kólik oqıǵalarynyń aldyn alýǵa kómektesedi. Bul týraly Polisia.kz jazdy.
— Qurmetti azamattar! Qoǵamdyq tártipti saqtaý jáne azamattarǵa jedel kómek kórsetý maqsatynda zamanaýı tsıfrlyq tehnologııalar keńinen engizilýde. Bul sheshimder qylmystyq quqyq buzýshylyqtardyń aldyn alýǵa, jol qaýipsizdigin qamtamasyz etýge jáne tártip buzýshylardy anyqtaýǵa múmkindik beredi. Máselen, ushqyshsyz ushý apparattary jol qozǵalysyn áýeden baqylaıdy. Olar jyldamdyqty asyrǵan jáne jol júrisi qaǵıdalaryn óreskel buzǵan júrgizýshilerdi tirkeıdi. Eń bastysy drondar quqyq buzýshylyqtarǵa jedel den qoıýǵa jáne jol-kólik oqıǵalarynyń aldyn alýǵa kómektesedi. Patrýldik avtokólikterge ornatylǵan mobıldi keshender de jol qozǵalysyn baqylaýda mańyzdy ról atqarady. Olar kólik aǵynynyń arasynan uıaly telefon qoldaný, jaıaý júrginshige jol bermeý, jyldamdyqty asyrý jáne manevr jasaý qaǵıdalaryn buzý sııaqty derekterdi avtomatty túrde anyqtaıdy. Qala syrtyndaǵy joldarda kóliktiń ortasha jyldamdyǵyn baqylaý júıesi qoldanylady. Qazirgi tańda bul júıe respýblıkalyq mańyzy bar 12 negizgi baǵytta engizilgen. Sonymen qatar jol-kólik oqıǵalarynyń aldyn alý úshin lazerlik júıeler paıdalanylýda. Olar túngi ýaqytta, aýa raıy qolaısyz kezde jáne júrgizýshiniń sharshaǵanyn nemese uıqyly kúıde otyrǵanyn anyqtaýda erekshe mańyzdy. Tsıfrlyq tehnologııalarmen qatar joldyń júrý bóligin jasandy túrde taryltý jumystary da júrgizilýde. Bul júrgizýshilerdiń jyldamdyqty tómendetip, jolǵa muqııat nazar aýdarýyna yqpal etedi. Atalǵan sharalardyń barlyǵy azamattardyń qaýipsizdigin arttyrýǵa jáne jol-kólik oqıǵalarynyń sanyn azaıtýǵa baǵyttalǵan. Biz úshin árbir júrgizýshi men jolaýshynyń jolda ózin qaýipsiz sezinýi mańyzdy, — dedi ІІM ákimshilik polıtsııa komıteti tóraǵasynyń orynbasary Baǵlanbek Aıtpaev.
Eske sala keteıik, buǵan deıin ІІM 65 jastan asqan júrgizýshilerge qatysty jańa talapty túsindirgen bolatyn.
