M. Tólebaevtyń 100 jyldyǵyna oraı «Astana Opera» teatrynda «Birjan-Sara» operasy qoıylmaq
ASTANA. 30 qzan. QazAqparat - Qazaqtyń kórnekti kompozıtory Muqan Tólebaevtyń 100 jyldyǵyna oraı 8 qarashada «Astana Opera» teatrynda kompozıtordyń úzdik shyǵarmalarynyń biri - «Birjan-Sara» operasy Reseıdiń Eńbek sińirgen ártisi ıÝrıı Aleksandrovtyń qoıylymynda usynylady.
Bul týraly QR Mádenıet jáne aqparat mınıstrliginiń baspasóz qyzmetinen habarlady.
Operanyń jańa mýzykalyq redaktsııasynyń avtory - Abzal Muhıtdınov. Basty partııalardy oryndaıtyndar - opera sahnasynyń juldyzdary Qazaqstan jáne Tatarstan Respýblıkalarynyń Halyq ártisi Nurjamal Úsenbaeva jáne Reseıdiń Eńbek sińirgen ártisi Ahmet Aǵadı.
Altynaıdyń rólinde belgili opera ánshisi Dına Hamzına, Estaıdyń partııasyn Beıimbet Tańaryqov oınaıdy.
Qoıýshy rejısser ıÝrıı Aleksandrov kórermen nazaryna «Birjan-Sara» operasynyń fınaly ózgertilgen jańa qoıylymdy usynady. Onda folklorlyq saryn ekinshi orynǵa qalady da operany adam sezimi bıleıdi, sezim - búgingi zaman adamyna barynsha tanys qasıetter. Qoıýshy rejısserdiń ózine qoıǵan basty maqsaty - operany búgingi jas býynǵa túsinikti etip qana qoımaı, sondaı-aq, birinshi kezekte, kórermenge jeke bas dramasy men máńgilik mahabbat ıdeıasyn jetkizý.
«Mýzykalyq teatrda men kisi ólimin múldem moıyndamaımyn, meniń oıymsha bul jerde basqa ólim, sol sebepti kisi ólimi ómirde, teatr syrtynda qala bersin. Biz qoıylym sońyn ózgertip, Birjandy ómirge ákelemiz, sebebi, men ónerdi óltirýge bolmaıdy dep esepteımin. Biz bir ózgeris engizdik: ekinshi akt kezindegi Birjan men Saranyń bir-birine ǵashyq ekeni anyqtalatyn dýetti sońyna qoıdyq», - deıdi Aleksandrov.
