M.Toqtaǵazın Halyqaralyq aqparattandyrý akademııasynyń múshesi bolyp saılandy
ASTANA. QazAqparat - L.N. Gýmılev atyndaǵy Eýrazııa ulttyq ýnıversıtetiniń Jýrnalıstıka jáne saıasattaný fakýltetindegi Baspasóz jáne baspa isi kafedrasynyń dotsenti, fılologııa ǵylymdarynyń kandıdaty Muratbek Toqtaǵazın Halyqaralyq aqparattandyrý akademııasynyń tolyq múshesi - akademıgi bolyp saılandy.
Ol «Derektilik pen kórkemdik», «Aqmola úshin aıqas» kitaptarynyń avtory, «Áıgili Ázaǵa», «Ázilhan Nurshaıyqov jáne qazaqstandyq jýrnalıstıkanyń ózekti máseleleri», «Bekzat bolmys» kitaptarynyń qurastyrýshysy, «Bútin bitim» kitaby qurastyrýshylarynyń biri. Respýblıkalyq baspasózde 500-den astam kósemsózdik materıaldary men ǵylymı maqalalary jaryq kórgen.
Sondaı-aq Muratbek Toqtaǵazın qoǵamdyq jumystarǵa da belsene at salysady. Ol QR Bas redaktorlar klýbynyń vıtse-prezıdenti retinde kóptegen respýblıkalyq medıa-sharalardyń ótkizilýine muryndyq bolyp júr. Ulttyq «Ádilet» aptalyǵynyń redaktorlar keńesiniń tóraǵasy jemqorlyq pen bıýrokratızmge qarsy baǵyttalǵan kóptegen taldamaly materıaldardyń jarııalanýyna sebepshi bolýda. Taǵy bir atap kórseterlik jaıt, belgili qalamger «Qazaqstan Respýblıkasy astanasynyń úzdik jýrnalısi», respýblıkalyq «Asyl sóz qudireti» konkýrstarynyń laýreaty, «Qazaqstannyń mádenıet salasynyń úzdigi», «Mádenıet maıtalmany» tósbelgilerimen marapattalǵan, Halyqaralyq M. Sholohov atyndaǵy medaldiń ıegeri. Qazaqstan Jýrnalıster odaǵynyń, Halyqaralyq aqparattyq birlestiginiń múshesi.
Aıta keterligi, Halyqaralyq aqparattandyrý akademııasy aqparattar tabıǵatyn tanyp bilý, aqparattyq tehnologııalar, ekologııalyq jáne aqparattyq-taldamalyq qyzmet, qoǵamdy aqparattandyrý jáne biryńǵaı álemdik aqparattyq birlestik qurý salasynda pikirlesterdiń basyn qosatyn ózin ózi basqaratyn táýelsiz qoǵamdyq birlestik bolyp tabylady. Ol - elimizge tanymal BAQ ókilderi men ár saladaǵy áıgili ǵalymdardyń basyn qosatyn irgeli uıym.
