M.Telibekov jalaýyn kóterip júrgen uıymdar eshqaıda tirkelmegen - Din isteri komıteti
ASTANA. QazAqparat - Búgin Astanada ótken «Din salasyndaǵy ózekti máselelerdi jarııalaý jónindegi aqparattyq jumystyń qaǵıdalary men basymdyqtary» atty din salasyndaǵy máselelerdi BAQ-ta jarııalaý boıynsha jýrnalısterge arnalǵan trenıng barysynda din isteri komıtetiniń tóraǵasy Ǵalym Shoıkın dinge qatysty kez kelgen resmı aqparatty komıtet pen Qazaqstan musylmandary dinı basqarmasynyń quzyryndaǵy qyzmetkerler bere alatynyn málim etti.
«Din isteri komıteti qoǵam úshin, jýrnalıster úshin ashyq ekenin aıtqym keledi. Jýrnalısterge qandaı kómek bere alamyz? Buqaralyq aqparat quraldary sıýjet jasaýǵa, jýrnalıstik zertteý júrgizýge, reportaj jasaýǵa múddeli bolsa, biz, din isteri komıteti, memlekettik qupııaǵa jatpaıtyn kez kelgen aqparatty usyna alamyz. Dintanýshylar men sarapshylardy usyna alamyz. Mysaly, teris dinı aǵymnan zardap shekken azamattardy, tipti sottalǵan azamattardy suhbatqa tartyp bere alamyz. Óıtkeni, ol qoǵamǵa oı salatyn edi», - deı kele komıtet tóraǵasy jýrnalısterge usynys-pikirlerin aıtýǵa daıyn ekenin jetkizdi.
«Dinge qatysty shýly málimdemeler týraly tek dinı basqarmadan pikir alý kerek. BAQ týraly zańǵa sáıkes, olar mindetti túrde aqparat berýi kerek. Osyndaı málimdemeler aıtylsa, jýrnalıster birden Telibekovke (ózin «Qazaqstan Musylmandar odaǵy» degen uıymnyń tóraǵasymyn dep tanystyratyn Murat Telibekov) júginedi. Telibekov jalaýyn kóterip júrgen uıymdar eshqaıda tirkelmegen», - dep málim etti Ǵ.Shoıkın.
Bul rette, komıtet tóraǵasy din taqyrybyna qalam tartyp, sıýjet jasaıtyn jýrnalısterdi birneshe termınnen aýlaq bolýǵa shaqyrdy.
«Buqaralyq aqparat quraldarynda din máselesi kóp jazylady jáne dinı termınder kóp qoldanylady. Mysaly, «jıhadshy», «sheıit» degen termınder. Biraq, ókinishke qaraı, jýrnalısterdiń ózderi de, oqyrman men kórermen de bul sózderdiń qandaı maǵyna beretinin bilmeı jatady. Mysaly, terrorıst meshitke baryp, óz ózin jaryp jiberse, BAQ-ta «Jıhadshy meshitte ózin jaryp jiberdi» degen taqyryppen jańalyq shyǵady. Biraq, ol jıhadshy emes, ol qylmysker, ol terrorıst. Jıhadshy men sheıit degenniń dindegi maǵynasy múlde bólek. Islam dinindegi sheıit bolǵan adam - ómirin dinge arnaǵan, Otanyna qyzmet etken, Otanyn jaýdan qorǵap, tótenshe jaǵdaıda erlik kórsetip, ózgeler úshin óz ómirin qurban etken adam. Al, qazir biz ózin ǵana emes, ózgelerdi ádeıi óltirgenderdi sheıit boldy dep júrmiz. Sol sııaqty, «ıslamshy» degen sóz halyqaralyq sózdikte terrorıst te emes, jıhadshy da emes, «ıslam dinin zertteýshi adam» dep qana kórsetilgen», - dedi sózin túıindeı kele din isteri komıteti tóraǵasy.
