ІІM telefon alaıaqtarynyń basty ádis-tásilderin atady

ASTANA. KAZINFORM — Qazaqstan Іshki ister mınıstrligi telefon arqyly jasalatyn alaıaqtyq áreketterde qylmyskerler jıi paıdalanatyn sózderdi atady.

Kóbinese alaıaqtar mynadaı tásilderge júginedi:

• «Qarajatyńyzdy saqtaý úshin olardy basqa shotqa aýdaryńyz nemese depozıtten sheship alyńyz» (jalǵan qaýip tóndirip, shuǵyl áreketke ıtermeleý).
• «Sizben tergeýshi / ІІM nemese UQK qyzmetkeri sóılesip tur (aty-jóni). Tutqany qoımańyz!» (jalǵan laýazym arqyly qysym jasaý).
• «Bul qońyraý týraly eshkimge aıtpańyz, qupııa operatsııa júrgizilip jatyr!» (jábirlenýshini oqshaýlaý).
• «Kodtyq sózdi ózgertýge ótinim tústi» (shotqa qol jetkizýden aıyrylý qaýpin týdyrý).
• «Men — baılanys operatory qaýipsizdik qyzmetiniń mamanymyn. Qazir sizge kod keledi, sony habarlańyz!» (SIM-kartany urlaý jáne onlaın-bankıngke kirý úshin qoldanylatyn ádis).
• «Depozıttegi qarajatty banktiń „qorǵalǵan“ shotyna aýdarý qajet» (aqshany jalǵan qorǵaý tásilimen ıemdený).
• «Bul — ulttyq qaýipsizdik qyzmetkeri. Qaı bankte shottaryńyz ben nesıelerińiz baryn habarlańyz. Olardy dereý buǵattaý úshin karta men depozıt derekterin berińiz» (derekterdi tolyq jınap, keıin urlaý).
• «Týysyńyz qıyndyqqa tap boldy (JKO, polıtsııa, aýrýhana). Shuǵyl aqsha aýdaryńyz!» (emotsııalyq qysym jasaý).
• «Siz utyp aldyńyz / ótemaqy alasyz! Ol úshin baj salyǵyn (salyqty, jetkizý qunyn) tóleńiz» (jalǵan syıaqy ýádesi).
• «Sizdiń shotyńyzdan aqsha sheshilmek boldy. Operatsııany toqtatý úshin SMS kodyn atańyz» (qorqytyp, bir rettik qupııasózdi aldyrý).

ІІM málimetinshe, osylaısha alaıaqtar azamattardyń mobıldi qosymshasyna kirýge nemese qarajatty «qorǵalǵan shotqa» óz qolymen aýdarýǵa sendiredi.

Sondaı-aq TeamViewer, AnyDesk, RustDesk, HopToDesk, RudeDesktop sııaqty qashyqtan qol jetkizýge arnalǵan baǵdarlamalardy ornatýǵa májbúrleýi múmkin.

Mınıstrlik turǵyndarǵa eshqashan SMS kodtaryn, CVV, PIN-kod, kartanyń tolyq derekterin habarlamaýǵa jáne aqshany «qorǵaý» jeleýimen aýdarmaýǵa keńes beredi. Shynaıy polıtsııa qyzmetkerleri, bank nemese operator ókilderi telefon arqyly aqsha nemese kod suramaıdy.

Aıta keteıik, Ulttyq bank jasandy ıntellekti arqyly jasalatyn alaıaqtyq shemalar týraly eskertti.